Uit en Tuis is die rubriek waar ons gaan gesels met mense wat in die buiteland woon, of wat daar gewoon en gewerk het, maar nou weer terug is in Suid-Afrika. Ons verneem graag van enigeen wat hul belewenisse met ons wil deel. Vandeesweek gesels ons met Marisa Haasbroek wat in Maryland, Amerika woon.
- Hallo Marisa! Vertel ons meer van jouself/julle en waar jy/julle woon.
Ek, Andries, my man, en ons twee tieners, Johannes en Annamaria bly in Maryland, omtrent so veertig kilometer van Washington DC af.
- Wat doen jy daar?
My man werk op ʼn kernreaktorprogram vir ʼn Amerikaans-Suid-Afrikaanse maatskappy. Die kinders word getuisskool, maar benut nou geleenthede vir opleiding hier in Amerika. Johannes begin juis binnekort studeer aan dieselfde gemeenskapskollege waar Edward Snowden studeer het. Annamaria stel belang in animasie, neem aanlynklasse en sal eendag graag tekenflieks vir maak. Ek skryf Afrikaanse stories as ek ʼn halwe kans kry.
- Was dit moeilik om in ʼn ander land aan te pas?
Ja, baie. Alles is anders, hulle ry aan die anderkant van die pad, gebruik nie metrieke eenhede nie en, veral aan die begin, het ons soms gesukkel as hulle so vinnig Amerikaans praat.
- Wat is die lekkerste en slegste avonture wat jy al daar beleef het?
Een van die lekkerste avonture was ons besoek aan die historiese dorpie Colonial Williamsburg in Virginia. Die slegste wat ons oorgekom het, is dat ons ʼn baie groter deposito op ons huurhuis moes neersit as Amerikaners, omdat ons geen kredietrekord hier het nie. In enige amptelike sake moet ons altyd weer en weer ʼn bewys van Homeland Security aanvra om te verklaar dat ons nie “illegal aliens” is nie.
- Wat mis jy die meeste van Suid-Afrika?
Mense wat vir dieselfde goed as jy lag. Amerikaners neem hulself tog so ernstig op. Dan ook natuurlik biltong, blatjang en die wonderlike varsprodukte wat ons in Suid-Afrika so vanselfsprekend aanvaar. In Suid-Afrika het ons gevoel of ons deel is van ʼn gemeenskap. Hier leef mense baie individualisties.
- Hoe het immigrasie julle geraak?
O nee, ons het glad nie geïmmigreer nie. Eendag kom ons terug huis toe. My man moet ek elke oggend soos ʼn tent aan die grond vaspen, anders klim hy op die eerste, die beste vliegtuig Suid-Afrika toe. Ons verlang verskriklik.
- Wat geniet jy/julle die meeste van die lewe in Amerika?
Die gerief van goed oor die pos bestel. Die vinnige internet. Winkels wat tot laat oop is.
- Kom jy/julle terug Suid-Afrika toe?
Ongetwyfeld.
- Was dit maklik om julle voete daar te vind?
Dit help dat ons Engels goed verstaan en alles op die internet kan naslaan as ons vasdraai. My man het byvoorbeeld ons Amerikaanse belastingopgaaf self voltooi. Dalk is dit maar deel van die Boer-maak-ʼn-plan lewenshouding wat ons mense het.
- Enigiets anders wat jy wil byvoeg?
Sonder Skype, Whatsapp en eposse waarmee ons met vriende en familie in Suid-Afrika kontak te hou, sal die heimwee ons onderkry. Een van die bittersoet ervarings wat ek en my dogter gehad het, was toe ons al twee Koekedoor reekse kon volg, danksy ʼn intekening op SA TV. Ons lees elke dag Maroela Media om op hoogte te bly van gebeure in ons vaderland.
