Mandie Papendorf
Ek en my man Max en drie van ons vriende het in Januarie 2019 besluit dat ons deur Europa wil toer – meer spesifiek in lande soos Kroasië waarvan almal nie altyd praat nie. So het ons avontuur oor die Paasnaweek in Praag begin waar ons drie aande deurgebring het. Vandaar is ons per trein na Wene waar ons een aand oorgeslaap het. Ná ons die ongelooflike tuine en paleise van Wene beleef het, het ons weer per trein gereis; dié keer na Boedapest waar ons nog drie aande oornag het. Daarna is ons met ’n bus na Kroasië waar ons die oorblywende sewe nagte deurgebring het. Ons toer deur Kroasië het in Zadar begin, met stoppe in Zagreb, Split en Hvar, en laastens Dubrovnik, waar ons reis tot ’n einde gekom het.
Van ons hele toer was Boedapest egter my gunstelingstad. Dit is ook waar hierdie ongelooflike foto’s geneem is. Dis ’n stad wat nooit my gedagtes verlaat het nie en waarna ek enige dag sal terugkeer. Ek vang myself daagliks dagdroom terug Boedapest toe, veral in hierdie tye waarin ons onsself tans bevind. Die groot geboue, paleise, vriendelike mense, Paasstalletjies, lekker kos en bier, asook goedkoop winkels met die mooiste serpe en geskenkies vir familie en vriende het ons heeltemal te veel geniet.
Boedapest is voorwaar ’n bestemming wat op jou tiktaklys hoort en ek sal ’n besoek aan dié stad beslis aan enige iemand voorstel.
