deur Amorita Kluyts
Ons jaarlikse Brisbane Vrouedag op November was weer eens ’n groot sukses. Ons was 110 vroue wat “non-stop” gekuier het! Die doel hiervan is tweeledig – om mekaar te ondersteun en aan te moedig, en om nuwe vroue welkom te heet. Ons praat net Afrikaans, alhoewel daar ook gereeld Engelssprekende vroue saamkuier. Ons vertaal en verduidelik vir hulle, maar dís nou die een dag in die jaar wat nie ons nie verskoning vra om Afrikaans te praat nie. Ons huur gewoonlik die venue net vir drie ure, maar dit is elke keer so ’n lekker kuier dat sommige vroue die hele dag kuier, tot sononder langs die water!
Hierdie jaar het ons weer fantastiese sprekers gehad, vier vroue – van verskillende ouderdomme, waarvan die jongste 21 is – wat almal al “coaching”- of mentorskaprolle gehad het. Die sprekers was Ilona Furstenburg, Marco Zietsman, Anita Geldenhuys en Alona Zietsman. Yolande Steyn het terugvoer gegee oor OzGeeOm, wat die afgelope jaar hoogs suksesvol was en elke sent terugploeg in Suid-Afrika. Ek is ook baie opgewonde oor die eerste Suid-Afrikaanse Filmfees wat in Mei 2022 in Brisbane gaan plaasvind.
Die hoogtepunt was die mooi tafels. Elke tafel het ’n tema gehad – die temas was Kersfees, African Sunset, Ubuntu, Weskus, Boeresjiek, Plaas, Rampokkerbende, Zebra, Classy Protea, Gee jou hart vir Afrika, en Scatterlings of Africa.
