“Classic Motors and Classic Music in Herne Bay” het die opskrifte verkondig. Herne Bay se inwoners roem hulle daarop dat hul dorp se kloktoring die hoogste alleenstaande een op aarde is. Toe ons op die mooi sonskynoggend daar aankom, was dit gou duidelik dat die “klassieke motors”-deel nie oordrewe was nie. Die magdom wiele uit omtrent elke dekade het gewissel van ’n 1914 Peugeot, militêre Jeeps, regte bakkies soos ons hulle van die sestigs onthou, tot pragtige E-tipe Jaguars en ’n amper nuwe Bentley.
Maar dis die mense, alle kleure (tatoeëermerke) en geure (meestal alkohol en tabak) wat ’n mens bybly. Die ou vakansiedorpies op die Kent-kuslyn het altyd so ’n ondertoon van vervallenheid, amper soos ’n middeljarige can-can-danseres met te veel grimering. En baie van die plaaslike karakters val ook in daardie kategorie. Daar was deurentyd lewendige, dreunende musiek vanaf die sentrale verhogie, verseker nie klassieke musiek nie, maar watwou, as die son skyn en die motors brul, kloof ons nie hare nie. In elk geval, Johnny Cash en Glen Campbell sou waarskynlik daarmee tevrede gewees het. Daar was baie ander stalletjies ook, ’n hele paar vir liefdadigheidsorganisasies wat oudsoldate bystaan, en een wat vegetariese roomys verkondig het. Restaurante was van vroeg af stampvol, en baie mense het gou kampstoele en tafels opgeslaan en in groepe gesit en kuier. Dit het alles tot ’n sorgvrye karnavalgevoel bygedra.
Die “Herne Bay Classic Motor Show” op 20 Augustus 2017 het meer as 15 000 besoekers regdeur die dag getrek. Die skou het die “Classic Music Show” aangebied, met The Smokin’ Mavericks, Jodie South, Carla Winters, Martin Farbrother en Mike Lloyd, asook die “Retro Market”, handelaars “County Garage” (Ford) en “Perry’s of Canterbury” (Vauxhall) en vele meer. http://classicmusicandmotors.co.uk/
