Deur Ira van der Merwe
As ek geweet het dat ek vir bykans ’n dekade lank nie ’n vleispasteitjie sou kon eet nie, sou my laaste een verseker nie ’n garage-pie gewees het nie. (Jy weet, die tipe waarvoor jy Rennie vir nagereg moet suig om jou van die hewige hel van sooibrand te verlos.)
As Suid-Afrikaner kan ’n mens jou nie voorstel dat dit iets is wat jy in die buiteland gaan mis nie; dat dit iets eie is aan die Britse kultuur en lande met ’n Britse erfenis. Die pasteie wat ek in my laaste klomp gasheerlande verslind het, was elkeen soet en vol vrugte – nie ’n stukkie vleis in sig nie! Hier kan jy peperbiefstukpastei op jou magie skryf en met jou hempie afvee, sê ek altyd.
In my tiende jaar in die vreemde kom Darren Greysmark uiteindelik tot my redding. Sy onderneming in Warskou, Pole, met die kennelik Suid-Afrikaanse naam Ke Nako Foods lewer die heerlikste tuisgemaakte pasteie landswyd by jou deur af – boonop met Mrs Balls! Hulle verkoop natuurlik ook biltong, droëwors en boerewors. En daar wag ’n paar aangename verrassings op hul tuisblad, soos mieliepap en selfs Fizzers!
Ja, ja, ek weet ek kan self pasteie bak. Maar jy weet mos hoeveel beter iets smaak as jy nie self voor die stoof gesloof het nie. Meer nog: Dis my tweemaandelikse bederf, vir die dae wanneer ek ’n mammabreek nodig het. Ek pluk bloot die vrieskasdeur oop, gooi slaai op ’n bord en roep vir Miesies Balls – kos vir ’n koning, sonder skottelgoed!
As jy jouself in Warskou bevind en jy kan jou lus vir ’n vleispasteitjie of boereworsrol nie langer inhou nie, gaan maak oor naweke ’n draai by hul kostrokkie. Gaan ontmoet die Kapenaar en sy bobaasspan persoonlik.
