Leesvordering:

Die Ierse Cheetahs

Mar 26, 2020

Baie dinge in Ierland verskil van dié in Suid-Afrika – dink nou maar aan die weer, die groenigheid en die oorvloed van water en elektrisiteit – maar daar is een ding wat beide Iere en Suid-Afrikaners gaande het: rugby.

Dis lekker om te sien hoe passievol die mense hier oor die sport is. As Ierland ‘n ander span in die Ses Nasies pak, is elke pub ‘n miernes van bedrywighede. En almal skree uit volle bors wanneer daar punte aangeteken word.

Maar dis nie net die internasionale wedstryde wat soveel aftrek kry nie. Die Pro14 is boaan baie van die Iere se lys van gunsteling-rugbywedstryde om te kyk. Oral in Ierland waar jy dié wedstryde bywoon, is die stadions tussen 60% en 80% volgepak.

Vir ons as Suid-Afrikaners en lojale Cheetahs-ondersteuners is dit natuurlik ‘n hoogtepunt wanneer die ouens met hul oranje truie hier kom uitdraf. Ons is ‘n groep vriende wat saam ‘n Cheetahs-ondersteunersklub in Dublin begin het. En waar ook al die Cheetahs op die eiland speel, daar is ons ook.

Sedert September 2018 het ten minste 10 van ons al gaan kyk hoe die Cheetahs die plaaslike spanne hier in Ierland gepak het: vir Munster in Limerick, vir Connacht in Galway, vir Leinster in Dublin en vir Ulster in Belfast. Reën, wind en storms kan maar kom, ons is daar! Eintlik gaan dit meer oor die saamwees en die feit dat dit ‘n Suid-Afrikáánse span is wat hier in Iérland kom speel.

Net omdat ons die Cheetahs gaan kyk, beteken dit nie ons almal is volwaardige ondersteuners nie. Maar kom ons wees eerlik: Al skree baie van ons eintlik vir die WP of die Bulle, is die Cheetahs gewoonlik almal se tweede span.

Hoewel ons heeltemal in die minderheid by die wedstryde is, maak ons indruk – op die ander ondersteuners sowel as die spelers. Ons maak gewoonlik baie geraas – die hees stemme die volgende dag is ‘n baie goeie teken dat ons ons kant gebring het. En na die tyd probeer ons altyd met die Cheetah-spelers gesels en saam met hulle foto’s neem. Hulle is altyd baie gewillig en staan graag ‘n tydjie aan ons af. Die ander ondersteuners is ook baie tegemoetkomend en wil net altyd weet of ons welkom voel en hoe hulle kan help om ons tyd daar nog lekkerder te maak.

Hoewel die Cheetahs se wedstryde in Ierland vir die 2019/2020-seisoen vir eers verby is, maak ons klaar planne vir die volgende Pro14-seisoen wat in September begin. Hopelik kry ons een van die dae ‘n wen hier in Ierland – al reën dit en waai die wind ons weg.

Vir meer inligting, sluit aan by ons Facebook-groep Cheetahs Rugby Ireland Fan Club (https://www.facebook.com/groups/336020657260590/), of gaan na die Vrystaat Cheetahs se webblad (http://www.fscheetahs.co.za/news/join-the-cheetahs-family-in-ireland-20190314) om meer oor ons te lees.

Lees ook ‘n berig oor ons op OFM en in Bloemfontein Courant (https://www.bloemfonteincourant.co.za/the-0-5-1-never-leaves-you/).

Meer oor die outeur

Elsje du Toit

Elsje du Toit is ’n plattelandse meisie wat in die Noord-Kaap grootgeword het en later vir 5 jaar as joernalis by Volksblad en Netwerk24 in Bloemfontein gewerk het. Sy en haar man, JJ, bly sedert Januarie 2018 in Dublin. Hoewel sy al ’n rukkie hier bly, kan sy nog nie heeltemal aan die yskoue weer gewoond raak nie, maar tog geniet sy elke oomblik

Volg ons op

Moet lees artikels

Maroela Media: Nuushooftrekke van die week

Maroela Media: Nuushooftrekke van die week

Maroela Media is ʼn Afrikaanse internetkuierplek waar jy alles kan lees oor dit wat in jou wêreld saak maak – of jy nou in Suid-Afrika bly, of iewers anders woon en deel van die Afrikaanse Maroela-gemeenskap wil wees. COVID-19: Twee derdes van staat se besteding dalk...

Saai stel Die Wynboer bekend om druk op familiewynboere te verlig

Saai stel Die Wynboer bekend om druk op familiewynboere te verlig

Saai (Suider-Afrika Agri Inisiatief) se wynbemarkingsprojek, Die Wynboer, is op 22 Oktober 2020 by die Marianne-wynlandgoed in Stellenbosch bekend gestel. Die Wynboer is ’n aanlyn wynwinkel wat daarop gemik is om familieboerwyne teen kelderdeurpryse aan verbruikers...

AfriForum versoek dringende vergadering met Ramaphosa

AfriForum versoek dringende vergadering met Ramaphosa

AfriForum het vandag ’n ope brief aan president Cyril Ramaphosa gerig waarin dié burgerregteorganisasie ’n dringende vergadering met hom versoek om plaasmoorde en die toekoms van Afrikaners as kultuurgemeenskap in Suid-Afrika te bespreek. Die doel van die brief is om...

Nuusbrief

Kontak ons

Maak 'n donasie

Wêreldwyd vriende

Jy sal ook dalk hiervan hou…

Pin It on Pinterest