Dit was net na 08:00 een oggend hierdie week toe ek myself êrens op die A5 noorde toe bevind, my eerste stop vir die dag reeds gemaak. Oral langs die hoofweë is daar plek waar vragmotorbestuurders kan aftrek om ’n uiltjie te knip, maar teen hierdie tyd van die oggend is meeste van hulle reeds verlate, hulle drywers moontlik op soek na hulle eerste koffiestop om die dag mee te begin.
Behalwe vir hierdie een plek. Soos wat ek aangery kom, herken ek reeds die babablou Amazon Prime-trok en onwillekeurig gee my Suid-Afrikaanse hart ’n effense ruk … Die yslike staaldeure staan wawyd oop en agterin is die wa dolleeg.
Kaping?
Gewapende roof?
“Nee”, kom wikkel my Britse brein hom in my selfgesprek in. “As die trokdrywers die deure oop los sodat wie ook al kan sien daar is niks van waarde binne-in nie, kry hulle (die drywers) hopelik ’n goeie nagrus.”
Ek kan nie help om te dink dat daar tye is dat leeg wees beter is as vol wees nie.
Leeg van afguns, angstigheid, venyn, onvergewensgesindheid, bitterheid …
Want sodra die vyand sien dat ek ’n wavrag van hierdie goed het, kan hy dit teen my gebruik om my te laat verstaan dat die Here nie plek het aan sy tafel vir iemand so sondebelaai soos ek nie.
Maar as ek gereeld my vrag gaan leegmaak – dit sélf by die Here se voete gaan neersit – ontneem ek die verpesting nie net die genot wat hy uit my verleentheid sou kry nie, maar bely ek terselfdertyd saam met elke vrag wat ek aflaai dat ek my uitnodiging na sy feestafel met dankbaarheid aanvaar.
Daardie vragmotor het heel moontlik ’n nuwe vrag optel nog voor sy eerste garage-pie-middagete.
Soos die Engelse spreekwoord sê: “Nothing is certain but death and taxes.”
En sonde.
Solank ons aan hierdie kant van die hemel is, sal die duiwel dit gedurigdeur gebruik om ’n wig tussen ons en ons God in te skuif. Of ten minste probeer gebruik.
Daar is ’n teenvoeter hiervoor:
“… as julle my woorde hoor en dit nie doen nie, is julle regtig dom.
Dan is julle lewens op ’n hoop sand gebou.
Wanneer die reëns en die storms oor julle losbreek,
sal julle lewens uiteindelik inmekaarstort.”
Matteus 7:26-27 (Die Boodskap)
’n Gesellige kuier om koffie en ’n paar oop Bybels terwyl ons in gebed intree vir mekaar is ’n troos. Wanneer daardie selfde gesprekke oorloop in my lewe buitekant my binnekring, dan word dit ’n skild en ’n swaard en terselfdertyd ook die fondasie van ’n dieper geloof.
Maak leeg.
Skud die stof van jou voete af.
Daar is dieper dinge wat wag.
Jou inspirasie vir die week: God is on the move
LEES OOK: Weglaatbaar klein
