Goeie nuus vir Suid-Afrikaners wat by die Britse weermag wil aansluit

Suid-Afrikaners wat daarin belangstel om aan te sluit by die Britse weermag sal bly wees om te verneem dat daar onlangs ’n reëlwysiging deurgevoer is ten opsigte van die werwingsproses van die Britse weermag.

Vroeër in hierdie maand (November 2018) het die British Armed Forces aangekondig dat burgers van Britse Statebondslande (Engels: British Commonwealth of Nations) vanaf die datum van aankondiging toegelaat sal word om aansoek te doen vir alle range en posisies in die Britse weermag, sonder dat hulle eers moet voldoen aan die vereiste van voorafgaande verblyf van vyf jaar in die Verenigde Koninkryk (VK).

In 2013 het die Britse weermag so ’n vyfjaar-verblyfvereiste ingevoer vir alle aansoekers. Sodanige aansoekers is dan verplig om eers vyf jaar in die VK te woon op grond van ’n visum wat lei tot permanente verblyfsreg, soos byvoorbeeld die voorouerroete tot permanente verblyf. Hierdie vereiste is dus nou geskrap, en alle burgers van lande wat behoort aan die Statebond kan nou aansoek doen vir alle range en posisies, sonder enige voorafgaande verblyfsvereistes

Suid-Afrika is natuurlik ook lid van die Statebond, en gevolglik kan Suid-Afrikaners dus nou aansoek doen om poste!

Statebondslande is tans die volgende:

Antigua en Barbuda, Australië, die Bahamas, Bangladesj, Barbados, Belize, Botswana, Broenei, Ciprus, Dominica, Eswatini (voorheen Swaziland) Fidji, Ghana, Grenada, Guiana, Indië, Jamaika, Kameroen, Kanada, Kenia, Kiribati, Lesotho, Malawi, Maleisië, Malta, Mauritius, Mosambiek, Namibië, Nauru, Nieu-Seeland, Nigerië, Pakistan, Papoea-Nieu-Guinee, Rwanda, Samoa, Seychelle, Sierra Leone, Singapoer, Sint Kitts en Nevis, Sint Lucia, Sint Vincent en die Grenadines, die Solomon-eilande, Sri Lanka, Suid-Afrika, Swaziland, Tanzanië, Tonga, Trinidad en Tobago, Toewaloe, Uganda, Vanuatu, Zambië.

Die minister verantwoordelik vir die Britse weermag, Mark Lancaster, het in sy aankondiging spesifiek na Suid-Afrika verwys. Hy het genoem dat die Britse weermag meer as 7 500 lede in sy geledere het wat burgers is van Statebondslande, met baie afkomstig uit Suid-Afrika, Fidji en Australië.

Die Britse weermag se werwingsproses

Vanaf die datum van aankondiging is aansoeke vir alle range en posisies in die Britse weermag oop vir Suid-Afrikaanse burgers vanaf die ouderdom van 18 jaar.

Daar is aangedui dat daar jaarliks 1 350 persone uit Statebondslande gewerf sal word. Hiervan sal ongeveer 1 000 gewerf word deur die leër (Engels: British Army), 300 deur die koninklike vloot (Engels: Royal Navy) en 50 deur die koninklike lugmag (Engels: Royal Air Force).

Die koninklike vloot en die koninklike lugmag het reeds met hulle werwingsproses begin. Die Britse weermag in Januarie 2019 sal met hulle werwingsproses begin.

Afhanklikes en Britse burgerskap

Suid-Afrikaanse burgers wat daarin slaag om by die Britse weermag aan te sluit, sal bly wees om te verneem dat hul gesinslede by hulle sal kan aansluit. Eggenote(s), lewensgeselle en afhanklike kinders kan ingesluit word as afhanklikes. Suksesvolle kandidate sal uiteindelik permanente verblyfregstatus kan verkry wat toegang bied tot Britse burgerskap.

Vir verdere inligting oor hoe jou gade, lewensgesel, kinders en ander afhanklikes by jou kan aansluit, is jy welkom om in verbinding te tree met Breytenbachs Immigration Consultants by www.bic-immigration.com.