Deur Susan Smit
Texas Potjie het verlede jaar hulle 15de herdenking gevier. Dit het begin in die jaar 2000 toe Fred en Yvonne Reinhardt ‘n paar mense oorgenooi het om saam met hulle “Thanksgiving” te vier. Die Suid-Afrikaanse gemeenskap in Houston het belangstelling getoon om elke jaar bymekaar te kom. Verlede jaar het Fred en Yvonne om gesondheidsredes uitgetree as komiteelede, maar hulle beplan om dit steeds by te woon. Die komiteelede is verantwoordelik vir alle reëlings.
Elke jaar tydens “Labor day weekend”, die eerste naweek in September, is daar groot opgewondenheid, want dit is Texas Potjie! Mense kom van reg oor Amerika, sommige van Suid-Afrika en verlede jaar was daar selfs Suid-Afrikaners van Australië ook. Die meeste mense is egter van Texas. Die grootste aantrekkingskrag is ons kultuur. Mense sien uit daarna om Afrikaans te praat, vure aan te steek, te braai en regte Boerelekkernye te eet, soos biltong, droëwors, boerewors, koeksisters, fudge, beskuit en jaffles om net ‘n paar te noem. Groot suksesse is die Boeremark, Boeresokkie en Sondag se Afrikaanse kerkdiens.
Baie mense neem in spanne deel aan kompetisies. Jy sal name hoor soos Kalahari Kraal, Southern Cross Cookers, Team Zebra, Bakgat Boertjies en Span Tafelberg. Sondag word daar ernstig potjies gemaak en daar is stilte in die kamp; jy wil die lug lekker skerp inasem om die wonderlike aroma van al die potte te kan kry.
Verlede jaar het Texas Potjie meer as 650 mense getrek, maar ons verwag hierdie jaar ‘n rekordgetal Suid-Afrikaners. Dit is ʼn vierdagnaweek waar daar net lekker gekuier word.
Meer inligting is beskikbaar op ons webtuiste by http://www.texaspotjie.com/ of op ons Facebook-blad.
