AfriForum en verskeie individue se hofaansoek oor repatriasieprobleme sou vandag in die Noord-Gautengse Hooggeregshof in Pretoria aangehoor word. Sake wat in die hofstukke aangeroer word, is die feit dat Suid-Afrikaners wat uit die buiteland na Suid-Afrika repatrieer, vir ’n minimum van veertien dae in kwarantyn moet bly in ’n fasiliteit wat die staat aanwys; dat hulle soms daar aan onaanvaarbare geriewe en gedrag blootgestel word, maar geen amptelike klagtekanaal het waardeur oplossings vinnig gevind kan word nie; dat kommunikasie oor hulle repatriasie en verblyf sporadies plaasvind en dus tot groot onsekerheid, spanning en frustrasies lei; dat mense in sommige gevalle verplig mag word om self vir hulle kwarantynverblyf te betaal; asook dat mense wat uit die buiteland terugkeer, ter wille van die veiligheid van almal betrokke so spoedig as moontlik vir COVID-19 getoets moet word.
Ter elfder ure het die betrokke staatsdepartemente versoek dat die saak uitgestel moet word. Omdat AfriForum se regspan die erns en noodsaak van die saak verstaan, het hulle ’n dringende allokasie daarvoor versoek. Die waarnemende adjunk regter president het toegestaan dat die saak in die week van 29 Junie 2020 aangehoor moet word.
Tot dan bly die bepaling van veertien dae verpligte kwarantyn onveranderd.
