deur Alexa Reinecke
Dis somer in Sydney! Die weer was lieflik en so ook die mense. ’n Bus het ons na ’n treinstasie geneem, waarna ons nóg ’n bus na Bondi Beach gehaal het. Dis nie “Bondie Beach” nie, dis “Bondaai Beach”, het hulle ons vinnig geleer. Danksy hierdie buitelugleefstyl is almal fiks en sonbruingebrand. Ons Airbnb-gasheer het van “coolies” (koelhouers) en “budgie smugglers” (Speedos) gepraat, waarvan ons baie op die strand gesien het.
Nóg ’n dag, nóg ’n vlug en ons het by familie aangekom wat langs die Gouekus woon. Dít was die heel lekkerste! Ons het braaibroodjies gemaak, die niggies leer ken, ander Suid-Afrikaners raakgeloop, self brandstof ingegooi, groter sonhoede gekoop en ons bene lam gestap. Uiteindelik het ons die veerboot geneem om Brisbane te verken, roomys geëet, té duur vir koffie betaal en maar ’n slaaibroodjie geëet.
Nou is ons platsak op pad terug na Suid-Afrika op ’n vlug van 15 uur, maar dit was beslis die moeite werd. Besoek gerus Australië, maar veral die Gouekus!
