Leesvordering:

Is daar ’n eerlikheidsbiblioteek naby jou?

Okt 18, 2021

deur Alana Bailey

Vanoggend is ek veronderstel om aan 2022 se begroting te werk, maar my gedagtes bly dwaal na ’n klein wonderwerkie hier naby ons kantoorgebou, waarvan ek gister die eerste keer bewus geraak het.

Wonderwerkie? Ja, want ek dink dit is iets besonders, maar ook omdat ek gewonder het of en hoe dit werk!

Laat ek voor begin.

Gister gesels ons senior taalpraktisyn, George, en ek oor mense se vrot Afrikaanse taalgebruik. Soos die een tydskrif wat vertel dat borduurwerk jou “aandagtig” maak (jou konsentrasievermoë verbeter, glo ek) en die radio-omroeper wat ’n aantreklike, fotogeniese akteur as ’n “fotografiese man” beskryf.

George meen toe tereg dat die verkeerde gebruik van woorde die gevolg daarvan is dat mense te min lees. Terwyl ons nog lofredes vir lesers sing, vra George skielik of ek al by die eerlikheidsbiblioteek hier naby die kantoor was.

Eerlikheidsbiblioteek?

Ek het al daarvan gehoor, maar nog nooit een gesien nie, wat nog binne loopafstand van die kantoor af verwag.

Op pad huis toe, ry ek toe by die biblioteek verby. Dit is ’n netjiese houtkas wat aan ’n boom geanker is, sonder om die boom te beskadig. Lesers kan enige boek gratis neem en ook boeke daarin terugplaas. So sirkuleer die leesstof in plaas daarvan om iewers stof te vergader.

Volgens George word die biblioteek beslis gebruik, want hy besoek dit gereeld en daar is elke keer ander boeke in. Ek gaan beslis ook so maak. Daar is ’n paar boeke by die huis wat gerus nuwe huise kan kry … en wie weet wat ek in die kas gaan raakloop!

Eerlikheidsbiblioteke is nie ’n nuwe konsep nie. Mense is waarskynlik meer bekend met die rakke boeke in hotelle en gastehuise waar vorige besoekers boeke agterlaat en jy jouself weer kan help as jy wil. Ek het ook al ’n boek wat klaar gelees is op ’n lughawebankie gelos en ook een so opgetel.

Tog lyk dit asof boekliefhebbers al meer van sulke spesiale hokkies boeke gebruik maak om hulle leesvreugde gratis met ander te deel (of van ongewensde boeke ontslae te raak). Volgens plasings op sosiale media word ou telefoonhokkies al lankal so ingespan in onder meer Duitsland en die Verenigde Koninkryk. Sommige winkels ruim selfs ’n rak of twee vir hierdie doel in en in die Castle Quarter-sentrum in Norwich, VK, is daar sommer ’n hele winkelruimte aan ’n eerlikheidsbiblioteek afgestaan.

Sommiges versoek net die lesers om ’n boek terug te plaas in ruil vir die een wat geneem word, ander laat die besluit aan die besoeker oor, en dan is daar ook plekke waar jy selfs ’n kontantdonasie mag los. Ek dink nie daardie een gaan werk in Suid-Afrika nie, maar dalk is ek onnodig negatief.

Is daar iets van die aard in jou omgewing, of het jy al ’n eerlikheidsbiblioteek op ’n interessante plek ontdek? Stuur asseblief vir Wêreldwyd jou foto’s en deel jou stories oor die ontdekkings wat jy daar gemaak het.

Maar wag, dit is amper etenstyd, en raai waarheen is ek dan op pad? Die begroting moet maar nog ’n halfuur wag.

Meer oor die outeur

Alana Bailey

Alana Bailey is Hoof van Kultuursake by AfriForum.

Soek

Volg ons op

Moet lees artikels

Maroela Media: Nuushooftrekke van die week

Maroela Media: Nuushooftrekke van die week

Deur Suné van Heerden Maroela Media is ’n Afrikaanse internetkuierplek waar jy alles kan lees oor dit wat in jou wêreld saak maak – of jy nou in Suid-Afrika bly, of iewers anders woon en deel van die Afrikaanse Maroela Media-gemeenskap wil wees....

Afrikaans is Groot hou vir ’n 11de keer konsert en jy kan wen!

Afrikaans is Groot hou vir ’n 11de keer konsert en jy kan wen!

In ’n wêreld vol onbekendes is daar een bekende: Afrikaans is Groot. Dis ’n saamkomplek omjou taal, jou kultuur en jou menswees te vier. En die jaar is geen uitsondering wanneer diegrootste familie-reünie nóg vanaf 8 to 17 November 2024 in die SunBet Arena in...

AfriForum vier 18 jaar van selfdoen

AfriForum vier 18 jaar van selfdoen

AfriForum, ’n organisasie wat vandag meer as 315 000 lede in elke uithoek van die land verteenwoordig, vier vandag sy agtiende bestaansjaar. Dié burgerregteorganisasie is op 26 Maart 2006 vir die eerste keer aan die publiek bekendgestel in ’n berig oor sy...

AfriForum TV

Nuusbrief

Kontak ons

Maak 'n donasie

Jeugblad

Jy sal ook dalk hiervan hou…

Teken in op die Kollig-nuusbrief en bly betrokke

Nuusbrief/Newsletter

Jy het suksesvol ingeteken!

Pin It on Pinterest