Leesvordering:

Is jou familie in die buiteland dié Kersfees? Vier dit só saam met hulle

Des 6, 2021

Met die Kersgety wat nader staan, kom ’n mens agter dat alles ietwat stadiger begin gebeur in Suid-Afrika. Die skole staan op sluit, die laaste jakarandas is met dwarrelende donderstorms uit die strate van Pretoria gespoel en die hitte van ’n regte Somerkersfees het reeds toegeslaan. In die winkelsentrums speel al wat ’n Kersliedjie is al sedert die eerste week van November. Dit is nie ’n verrassing dat die vakansieseisoen binnekort sy opwagting maak nie.

Terwyl die begin van Desember ’n vreugdevolle tyd is waartydens ons vol verwagting uitsien na ’n see- of bosvakansie en Kerslysies wat deur die kleinspan opgestel word, hou dié tyd van die jaar ook diep verlange en nostalgie in. Met Kerstyd dink ons altyd aan die neefs en niggies of die broers en susters wat aan die ander kant van die wêreld die viering op hulle eie voortsit. Dit is in dié tyd dat ons terugdink aan familie-etes op Oukersaand, aan saam geskenke oopmaak en selfs aan die goedkoop klappers wat met ’n knal ’n pen of sleutelhouer oplewer.

Hier is ’n paar maniere om Kersfees saam met jou geliefdes daar ver te vier as die gemis te erg raak.

Benut tegnologie ten volle as jou familie oorsee bly

Sosiale media kan die afstand heelwat verkort. Skep ’n WhatsApp-groep vir jou familie en deel resepte, foto’s en gesprekke met mekaar. Geniet die feestyd saam op Facebook, of gebruik ’n hutsmerk en deel in mekaar se vreugde op Instagram.

Met ’n bietjie vooraf beplanning om tydsones te koördineer, kan jy en jou familie van aangesig tot aangesig kuier op Skype, Zoom of Google Hangouts. Julle kan selfs saam aansit vir die Kersmaal; kook jou familie se gunstelinggeregte en geniet mekaar se geselskap terwyl julle eet. Of probeer die volgende idees:

  • Kom bymekaar om die Kersboom en maak geskenke oop.
  • Stel ’n speellys saam, deel dit met die familie en luister deur die dag daarna.

Nog ’n idee om nader aan jou oorsese familie te voel, is om almal te nooi om deel te neem aan ’n foto-uitdaging. Maak ’n lys Kersfeeskiekies wat elke familielid op Kersdag kan neem en deel dit met mekaar.

Deel jou tradisies met nuwe vriende

Om iets eg Suid-Afrikaans of ’n tradisie of resep eie aan jou familie met nuwe vriende te deel, sal ook help om die afstand tussen jou en jou familie kleiner te maak. Hou ’n eg Suid-Afrikaanse Kersete, kyk ’n Leon Schuster-fliek en vertel stories oor jou familie se Kersfeestradisies. So skep jy vir jou vriende ’n nuwe tradisie en jy voel meer tuis in die buiteland.

Betrek jou familie by jou Kersfees in die buiteland. Wou jy nog altyd leer hoe om jou ouma se heerlike aartappelslaai te maak? Vra haar om dit vir jou en jou nuwe vriende op Zoom of Skype te demonstreer. Nie net deel jy jou tradisies met jou nuwe vriende nie, maar jy spandeer ook tyd saam met jou familie.

Kerstyd is ’n moeilike tyd van die jaar as almal ver is, maar te danke aan tegnologie, herinneringe en tradisies kan die kontinente nader aan mekaar kom – een aartappelslaai of foonoproep op ’n slag.

Hoe gaan jy kontak hou met jou familie in die buiteland? Laat weet ons gerus ’n e-pos te stuur na wereldwyd@afriforum.co.za.

Meer oor die outeur

Wêreldwyd

Soek

Volg ons op

Moet lees artikels

Uit en Tuis: ’n E-pos uit Riga, Letland

Uit en Tuis: ’n E-pos uit Riga, Letland

In Uit en Tuis gesels ons met mense wat tans in die buiteland woon of voorheen daar gewoon en gewerk het. Hierdie week gesels ons met Marelize Vermeulen, wat tans in Riga, Letland studeer. Sy vertel ons van karums, ’n lekker wat van maaskaas gemaak word met allerhande...

Kollig Nuusbrief: 20 Januarie 2022

Kollig Nuusbrief: 20 Januarie 2022

Hiermee die nuutste Wêreldwyd Kollig. Die nuusbrief bevat inligting oor allerlei interessante sake, maar ook noodsaaklike kwessies vir Suid-Afrikaanse burgers in die buiteland. Stuur hierdie nuusbrief gerus aan. Enigiemand kan gratis daarop inteken. Hier is die...

Maroela Media: Nuushooftrekke van die week

Maroela Media: Nuushooftrekke van die week

deur Suné van Heerden Maroela Media is ʼn Afrikaanse internetkuierplek waar jy alles kan lees oor dit wat in jou wêreld saak maak – of jy nou in Suid-Afrika bly, of iewers anders woon en deel van die Afrikaanse Maroela-gemeenskap wil wees. ‘Werkplek-terroris’ Malema...

Nuusbrief

Kontak ons

Maak 'n donasie

Wêreldwyd vriende

Jy sal ook dalk hiervan hou…

Teken in op die Kollig-nuusbrief en bly betrokke

Nuusbrief/Newsletter

Jy het suksesvol ingeteken!

Pin It on Pinterest