deur Karen Jordaan

Ons bly in Prince George in Brits-Columbië,  Kanada. Ons het bykans ses jaar lank in Frobisher in Saskatchewan, Kanada (45 km van Estevan en 20 km van die VSA-grens met Noord-Dakota) gewoon nadat ons einde Februarie 2007 na Kanada verhuis het.

Ons kamp graag as die geleentheid homself voordoen, en ek deel graag ’n paar foto’s van die provinsiale parke waarby ons al gekamp het.

Die provinsiale parke van Brits-Columbië is almal onder die provinsiale bestuur en bied meestal geen fasiliteite nie, buiten miskien spoeltoilette en sentrale toilet-en-stortgeriewe. Daar is geen water- of elektriese koppelings vir kampeerkaravane soos wat die ander oorde bied nie. Jy moet jou eie water saamry en jou eie gas gebruik om te braai en te kook – en dan is daar gewoonlik slegs twee ure in die oggend en twee ure in die middag wanneer jy ’n kragopwekker mag gebruik.

Jou kampterrein moet te alle tye beervriendelik wees, want dié diere is maar altyd in die omgewing – hoewel ons nog net een gesien het op pad na ‘n kamp so 3 weke terug. Jy moet altyd sorg dat al jou kos weggepak is, jou vullis in die aangewese dromme gegooi word en ander soortgelyke maatreëls!

Paarensstrand

By Paarensstrand kan jy letterlik op die waterfront staan!

Dié strand, wat aan die suidwestelike oewer van Stuartmeer in Brits-Columbië lê, is ’n aangename klein provinsiale park waarvan bitter min mense buite die gebied skynbaar weet. Die rustige kampterrein, groot oewers en boothelling bied die ideale basis vanwaar mens die ryk geskiedenis kan ontdek en die legio ontspanningsmoontlikehede rondom Stuartmeer en die nabygeleë gemeenskap van Fort St. James kan geniet.

 

 

Whiskers Point Provinsiale Park

Dié foto’s is van Whiskers Point (130 km noord van Prince George) aan die McLeodmeer in Brits-Columbië.

Dié provinsiale park bied ’n welkome afklimpunt en ontspanningsgeleenthede aan gesinne wat met ’n lang vakansie is. Mens kan tot reg teenaan die meer kampeer in dié stil, beboste park wat op ’n skiereiland aan dié historiese meer geleë is. Daar is oorgenoeg afsondering met ’n suidelike blootstelling – een van die redes waarom kampeerders gaande is oor die asemrowende sonsondergange.

Dit is die tweede keer dat ons hier gekamp het. Natuurlik beleef mens dit nou weer heeltemal anders met kleinseun Xander wat nou die wêreld vol met ry met sy skopfiets ry of loop!

 

Pin It on Pinterest