Deur Cathy Kotzé
Hierdie was ons sewentiende Kersfees in Kanada.
In Nanaimo op Vancouver Eiland waar ons woon is sneeu selde ’n deel van Kersfees, maar ons het dit ook in 2009 beleef.
Kersfees in Kanada is vrolike versierde huise, buite en binne. Ons s’n se binnekant lyk soos ’n gemmerkoekhuisie: liggies, ’n hele paar Kersbome, ’n miniatuur dorpie, en talle Bethlehem-stalle met fyn porseleinfiguurtjies.
Ek en my kleindogter bak soetkoekies, Romany Creams, gemmerkoekies en meer – net soos ek en ons kinders in Suid-Afrika gedoen het. Ons Kersete is ’n Suid-Afrikaanse fees van gebraaide vleis, soetpatats, gebakte aartappels, rys en groente.
Kanadese het ’n oop hand oor Kersfees en ek twyfel of hier een kindjie is wat nie ’n Kersgeskenk kry nie. Kanadese skenk duisende splinternuwe geskenke aan liefdadigheidsorganisasies wat dit regoor die land uitdeel.
Ons maak ook kos- en kontantbydraes aan voedselbanke. As mens so oud soos ons raak, is jou behoeftes minder. Ons, soos baie Kanadese, koop klein geskenkies vir mekaar en maak eerder ’n skenking aan welsynorganisasies.
Ongelukkig het Kersvader ook in Kanada belangriker geword as Jesus, maar hier is gelukkig steeds Kerssangers (Christmas Carollers) wat Kersliedjies vir ons by die huis kom sing.
’n Geseënde Feestyd aan almal by Wêreldwyd.
