Die historikus dr. Jackie Grobler is vroeër vandeesmaand aangewys as die ontvanger van die Suid-Afrikaanse Akademie vir Wetenskap en Kuns (SAAWK) se Protea Boekhuisprys vir 2019 vir sy boek oor die Eerste Vryheidsoorlog, ’n publikasie deur Kraal Uitgewers. Die Eerste Vryheidsoorlog, 1880-1881 spruit uit Grobler se D-graadstudie oor dié oorlog en is aan die einde van 2018 by Kraal gepubliseer. (Klik hier vir meer inligting oor dié boek.)
“Dit is ’n geweldige groot eer vir Kraal en ons is opreg dankbaar vir die erkenning,” het Alana Bailey, uitvoerende hoof van die uitgewer kort ná die aankondiging gesê.
Die Protea Boekhuisprys word jaarliks toegeken en roteer tussen ’n gepubliseerde werk, beste M-verhandeling en beste D-proefskrif in Afrikaans. Vanjaar word die prys toegeken vir die beste gepubliseerde werk in geskiedenis of kultuurgeskiedenis in Afrikaans in die afgelope drie jaar. Carel van der Merwe was in 2016 die ontvanger van dié prys vir ’n gepubliseerde werk vir sy boek Donker stroom: Eugène Marais en die Anglo-Boereoorlog (uitgegee deur Tafelberg).
Intussen is die redakteur van die Kraal Histories-reeks, prof. Fransjohan Pretorius, ook onlangs aangewys as vanjaar se ontvanger van die Jan H. Marais-toekenning. Dié gesogte toekenning, met prysgeld van ’n halfmiljoen rand, word jaarliks gemaak vir ’n uitstaande bydrae tot Afrikaans as wetenskapstaal. Die nuutste Kraal Histories-publikasie, Bondgenote en dwarstrekkers: Die Transvaalse en Vrystaatse regerings in die Anglo-Boereoorlog, 1899-1902, deur Leopold Scholtz, is vroeër vandeesmaand bekendgestel. Klik hier vir meer inligting oor dié boek
Lees ook Kraal Uitgewers: Waar “broodnodige” geskiedenis lééf!
