Jannie du Toit vier sy halfeeu van musiekmaak saam met verskeie kunstenaarsvriende. Op Sondag 5 September 2021 vind die hoogtepunt van die vieringe in die AfriForum Teater in Pretoria plaas. Drie van Jannie se produksies word op een dag voor ‘n gehoor aangebied en vir uitsending deur kykNET NOU opgeneem.
Die vertonings word ook regstreeks gestroom. Kaartjies kos R150 per persoon per vertoning (R120 vir pensioenarisse).
Gratis wynproegeleenthede op die dag word deur Ken Forrester Wyne aangebied en Jannie vat ook hande met Loslitdag / Casual Day ten bate van persone met gestremdhede.
11:00 Die maan deur ‘n gaatjie in die nag met sy gunstelingliedjies van die legendariese Marie Tredoux van Jacobsbaai aan die Weskus. Jannie word begelei deur Chanie Jonker (klavier en akkordeon) en Annelie du Plessis-Hoberg (fluit en perkussie).
15:00 beSTEMmings: Dit is die vlagskip-produksie vir die halfeeuviering en Jannie het vir hierdie aanbieding sy musiekvriende genooi as gaskunstenaars, onder andere Coenie de Villiers, Anna Davel, Lochner de Kock, Laurinda Hofmeyr, Gisela de Villiers.
Susan Mouton (tjello), Chanie Jonker (klavier) en Theuns Botha (tromme).
19:00 Soli Deo Gloria (Aan God alleen die eer ): ‘n Program van geestelike musiek met Renette Bouwer en die a capella-groep Breathe (Gabi, Sizwe en Sandile) as gaskunstenaars.
Dapper Media en Forum Films – wat ook die drie verhoogproduksies verfilm – help ons om alles wat op die dag gebeur regstreeks te stroom. Dit beteken dat musiekentoesiaste teen ‘n klein bedrag die hele dag volledig deel van die feestelikheid sal kan wees. Om seker te maak dat almal landswyd – en ook wêreldwyd – dit sal kan meemaak, sal die stroming vir ‘n week lank beskikbaar wees.
Gesprekke met Jannie se kunstenaarsvriende en ander gebeurlikhede sal by die stroming ingesluit word, en om aanlyn kykers tussen die produksies verder besig te hou, sal Jannie se produksies Oesjaar en Kiekies – Lucas se Liedjies ook aanlyn te sien wees in die tye tussen die direkte vertonings.
Besprekings vir aanlyn of fisieke bywoning by www.afriforumteater.co.za.
Ter viering van Jannie du Toit se 50 jaar in die musiekbedryf gee Wêreldwyd stroomkaartjies vir “Kunstefees in die kleine” weg. Vul dié vorm in en staan ’n kans om ’n stroomkaartjie te wen.
Kom vier Jannie du Toit se 50 jaar in die musiekbedryf saam met ons.
