Die grootste uitdaging wat meeste Suid-Afrikaners in die buiteland in die gesig staar is om nuwe mense te leer ken en beter aan te pas. By Wêreldwyd het ons al baie geskryf oor maniere hoe jy kan aanpas deur kontak met jou familie en vriende in Suid-Afrika te behou, ’n nuwe taal aan te leer en so aan.
Die beste manier om te verseker dat jy die beste jy kan wees in ’n nuwe omgewing is egter om ’n netwerk te bou. Netwerke is nie net vir mense wat met ander wil sake doen nie; om te netwerk is ook ’n waardevolle manier om ’n ondersteuningsbasis op te bou vir daardie dae wat die verlange te veel raak en almal net te ver is.
Raak by ’n kerk betrokke
Daar is heelwat kerke in die buiteland wat Afrikaanse kerkdienste aanbied en groot groepe Suid-Afrikaanse ekspats het wat die dienste bywoon. Dit is die ideale plek om mense te ontmoet wat nie net begrip het waardeur jy gaan nie, maar ook self daardeur gegaan het. Julle kan saam nostalgies raak, saam deel in hartseer en die gevoel van verlange. Die bonus is dat jy vriende gaan maak wat saam met jou sal kan braai soos net Suid-Afrikaners kan.
Sluit by Facebook-groepe en groepe vir Suid-Afrikaners in jou omgewing aan
Daar is baie van hierdie groepe op Facebook. Hier kan jy vrae vra rakende dinge waaroor jy onseker is, soos byvoorbeeld wat die Amerikaanse ekwivalent van koekmeel is, hoe hulle na “half and half” verwys, asook die name van betroubare eiendomsagente in die omgewing.
Maak nuwe vriende en leer hulle van die Suid-Afrikaanse manier
Almal sê altyd jy moet nuwe vriende maak en meer leer oor die kultuur van jou aangenome land. Probeer daarby inskakel en so goed aanpas as wat jy kan, maar doen ook die teendeel. Maak nuwe vriende en leer hulle dan ’n bietjie van Suid-Afrikaanse gasvryheid; nooi hulle byvoorbeeld vir ’n ordentlike bring-en-braai en kuier tot die hane kraai!
Soek eg Suid-Afrikaanse produkte
Vind so gou as moontlik ’n winkel wat al jou gunsteling- Suid-Afrikaanse produkte aanhou sodat jy sommer blitsvinnig ’n bottel Mrs Balls-blatjang saam jou kos kan eet as die verlange huis toe net te erg begin raak. Wêreldwyd se Wêreldgids is ’n goeie plek om te begin soek!
Word deel van Wêreldwyd se aanlyn gemeenskap
Wêreldwyd is jou aanlyn tuiste in die buiteland. Kom kuier saam met Suid-Afrikaanse ekspats van regoor die wêreld en bly op hoogte van nuusgebeure in Suid-Afrika wat jou ook raak. Maak kontak en deel jou avonture met ons; ons sal graag van jou wil hoor!
Ons wil weet waar jy koop, met wie jy praat en hoe jou netwerk in die buiteland lyk.
Lys jou onderneming hier, of stuur ’n e-pos na wereldwyd@afriforum.co.za.
Deel op
