Olifantkoeie is bekend vir hulle sorgsaamheid teenoor hulle eie kalfies, asook die kalfies van ander koeie in hulle trop. Hulle is gemiddeld vir 645 dae dragtig ‒ met ander woorde byna 22 maande lank!
Two-V Productions se André en Kate het op hierdie toneeltjie in die Krugerwildtuin afgekom. ’n Paar jong olifante het om ’n watergat in die droë rivierbedding van die Silolweni-spruit naby Tshokwane saamgebondel. Die gat is vroeër deur ’n volwassene gegrawe om by die water uit te kom. Nadat sommige van die jongspan wegbeweeg het, het net ’n jong koei en haar baie klein kalfie oorgebly. Die olifantjie se planne om ook by die water in die gat te kom, het sy ma nogal besig gehou.
Teken gerus in op Two-V Productions se YouTube-kanaal en volg hulle Facebookblad. Boeke in hulle Op Vlerke-reeks kan van Kraal Uitgewers bestel word. Dit is slegs in Afrikaans beskikbaar en kan ook by winkels in ruskampe van die Krugerwildtuin gevind word.
