Hierdie klipspringerrammetjie (Oreotragus oreotragus) met sy dik, growwe jas, bestaande uit hol, bros hare, pyl nou en dan oor die pad om ’n ooitjie te beïndruk. Die Visagies het hom naby die Nkumbe-uitkykpunt aan die voetheuwels van die Lebomboberge, op pad na die Tshokwane-piekniekplek in die Nasionale Krugerwildtuin aangetref.
Skynbaar kan klipspringers 3 tot 3,6 meter reguit in die lug opspring. Hulle weeg gemiddeld 16 kilogram en is dus van die kleinste wildsbokke in Afrika. Hier kan ons sien hoe die klipspringer blare vreet – dit is hulle vernaamste bron van vog, wat beteken dat hulle nie van varswaterbronne afhanklik is nie. Hulle word enkellopend of in pare aangetref. Die ooi is sowat 7 maande lank dragtig, waarna ’n enkele lammetjie op ’n keer in die somer gebore word.
Die beeldmateriaal is andermaal deur Katie en André van Two-V Productions voorsien. Hartlik dank aan hulle hiervoor! Teken asseblief in op hulle YouTube-kanaal en volg hulle Facebookblad. Boeke in hulle Op Vlerke-reeks kan van Kraal Uitgewers bestel word. Die vierde boek in die reeks is eersdaags beskikbaar. Die boeke is slegs in Afrikaans.
