Vandeesweek is daar ’n video vir die veervolk-entoesiaste. Hier jag ’n hamerkop (Scopus umbretta) op sy unieke manier by die Kumanadam in die Nasionale Krugerwildtuin. Die hamerkop is ’n mediumgrootte waadvoël. Die vorm van sy kop met die lang snawel en kuif aan die agterkant herinner ’n mens aan ’n hamer ‒ vandaar die spesie se naam. Hamerkoppe is ook bekend (of is dit berug?) vir hulle enorme neste. Binne-in kom ’n spasie voor waarin die eiers uitgebroei word. Beide ouers sorg vir die broeiwerk en om die kuikens te versorg.
Die beeldmateriaal is andermaal deur Katie en André van Two-V Productions beskikbaar gestel. Hartlik dank aan hulle hiervoor! Teken asseblief in op hulle YouTube-kanaal en volg hulle Facebookblad. Boeke in hulle Op Vlerke-reeks kan van Kraal Uitgewers bestel word. Dit is slegs in Afrikaans beskikbaar en kan ook by winkels in ruskampe van die Nasionale Krugerwildtuin gevind word.
