In 1906 het die bosboupionier A.K. Eastwood uitheemse bome (Eucalyptus saligna) in Magoebaskloof, Limpopo, aangeplant wat vandag nog koelte aan moeë stappers bied. Hierdie groep bome in die Magoebaskloof Staatsbos is al meer as ’n dekade gelede tot nasionale kampioenbome verklaar. Die kampioenboomprojek word deur die departement van Bosbou, Visserye en Omgewing bestuur met die doel om bome van buitengewone nasionale bewaringswaarde te lys en hulle te beskerm. Die publiek kan bome nomineer om dié status te verkry. Sodra kenners dan die feite wat in die nominasie ingesluit is, geverifieer het, word bome só erken en gelys.
Agt jaar gelede het Leon Visser die hoogste van die genoemde groep bome in Magoebaskloof geklim om dit te meet. Dit was toe 81,5 meter hoog, wat daarvan die hoogste boom in Afrika, sowel as die hoogste aangeplante boom in die wêreld gemaak het. Sedertdien is ’n mahonieboom (Entandrophragma excelsum) van 81,5 meter hoog in ’n afgeleë vallei in Tanzanië gevind. Verder is ’n bergas (Eucalyptus regnans) in 2018 in die Orokonui Ecoreservaat in Nieu-Seeland gevind wat 82,25 meter hoog is.
As gevolg van die kwaai wedywering vir die kampioenskappe, het Suid-Afrikaanse dendroloë (boomkundiges) en boomklimmers besluit om te gaan kyk of die bome in Magoebaskloof intussen veel hoër geword het.
Dit was moeilik om te bepaal watter een van die drie hoogste bome, ook bekend as die Magoebaskloof Drieling, wat voorheen daar gemeet is, die hoogste is. Die boomkundiges het verder ook gemeen dat ’n boom wat selfs nog hoër mag wees dalk tussen hulle kon skuil. Op 8 November 2021 het die groep ’n boom wat langs die Magoebaskloof Drieling staan, uitgeklim en dit gemeet. Met baie noukeurige meetprosesse is vasgestel dat dit ’n yslike 83,7 meter hoog is. Daarmee is twee rekords gelyktydig gebreek – dit is naamlik nou die hoogste boom wat nog ooit in Afrika gemeet is, asook die hoogste aangeplante boom op die planeet! Dit sal voortaan as die Vierde Familielid bekendstaan omdat dit by die Drieling in die rekordboeke aansluit.
Die interessante proses wat gevolg word om die bome te klim en te meet, word in ’n artikel van NewsHorn Media beskryf. Twee van die betrokkenes, Izak van der Merwe en die einste Leon Visser, het ook meer daaroor op die Afrikaanse radiodiens RSG se program driesestig vertel. Die potgooi van hierdie gesprek sorg vir heerlike luistergenot.
’n Lys van al die kampioenbome in Suid-Afrika is op die webtuiste van die departement van Bosbou, Visserye en Omgewing te vinde.
Suid-Afrika hou ook die rekord vir die boom met die tweede grootste deursnee in die wêreld, naamlik die Sagole kremetart (Adansonia digitata), ook bekend as Muvuyo wa Makhadzi. Dit het ’n deursnee van 10,8 meter en ’n omtrek van meer as 33 meter!
Besoeke aan hierdie uitsonderlike bome kan vir natuurliefhebbers ’n heerlike ervaring wees!
Deel op
"*" indicates required fields
Nuutste artikels
