Natuurhoekie – Kyk fyn vir die dolfyn!

Deur Alana Bailey

Haai- en walviskyk is deesdae gewilde toeriste-aktiwiteite, maar dolfyne kom meer algemeen en volop langs die Suid-Afrikaanse kuslyn voor as walvisse en hulle sal daarom makliker gesien en bestudeer kan word.

Hoewel daar baie soorte dolfyne in die Indiese en Atlantiese Oseaan voorkom, is daar net drie spesies wat naby genoeg aan die Suid-Afrikaanse kuslyn voorkom om maklik en gereeld gesien te word. Dit is naamlik die bottelneusdolfyn, boggelrugdolfyn en die gewone dolfyn.

Bottelneusdolfyne word beskou as van die mees intelligente en emosioneel intelligente soogdiere op aarde. Hulle is ook ’n groot soort dolfyn wat gemiddeld 300 kilogram weeg en tot 4 meter lank kan word. Vroulike bottelneuse leef meestal langer as die manlike dolfyne en skenk geboorte na ’n draagtyd van 12 maande. Daar is al gevalle aangeteken van bottelneuse wat ouer as 60 jaar geword het!

Daar is ’n klein gemeenskap van boggelrugdolfyne in die waters rondom Suid-Afrika. Hulle word maklik uitgeken aan die breë bult onder hulle geronde rugvin. Anders as bottelneuse is hulle nogal skugter en sal mense en vaartuie probeer vermy. Hulle word selde langer as 2.5 meter en weeg gemiddeld 120 kilogram. Hulle is ’n bedreigde spesie.

Gewone dolfyne is kleinerig  – hulle bereik ’n maksimum lengte van 2,4 meter. Hulle is nie skaam vir geselskap nie en sal dikwels naby mense en bote gesien word. Hulle word ouer as 40 jaar.

Omdat dolfyne in groepe saam swem, groot en intelligent is, het hulle nie veel natuurlike vyande hier buiten groter haaispesies nie. Deesdae word orkas meer gereeld in Suid-Afrikaanse kuswaters opgemerk. Dit is bekend dat hulle dolfyne jag, maar nie of dié gedrag al plaaslik waargeneem is nie.

Daar is maatskappye wat dolfynkykvaarte aanbied, maar let daarop dat dolfyne in Suid-Afrikaanse waters deur van die sterkste bewaringswette in die wêreld beskerm word. Dit is byvoorbeeld onwettig om saam met hulle te swem, maar tog word toere wat swemsessies insluit, geadverteer. Wanneer jy gaan soek na dolfyne, maak seker dat jy die wetgewing ken en gehoorsaam. Moet ook nie toeroperateurs ondersteun wat dit oortree nie.

Foto: Miguel Angel Arreola Perez/ Unsplash

Lees ook: Natuurhoekie – Rooiborsies en janfrederikke