Verlede week maak ons toe ʼn draai in die Oos-Vrystaat. Destyds in die 90’s het my pa help bou aan die Katsedam, en ons het gedurende my Universiteitsjare in Ficksburg gebly.
Dit was heerlik om na meer as 13 jaar op die pragtige plaas van Friedl en Lindie von Maltitz, Saxon Park, te kon Airbnb. Friedl vertel my toe bietjie meer van die familiegeskiedenis en hoe sy oupagrootjie die plaas begin het.
By die eeuwisseling was hierdie plase basies maklik bekombare stukke grond, maar in ruil daarvoor het die destydse regering van families verwag om die rol van “grenspolisie en weermag” te vervul. Hierdie rol is hoofsaaklik deur die vrouens vervul omdat die mans (ter wille van oorlewing) verplig was om op die handelsroetes te gaan werk. Die vrouens en kinders was dan maande aaneen alleen op die plase.
Mettertyd het hierdie boere met verskeie soorte boerderye geëksperimenteer (probeer en tref). Ficksburg het oor die jare bekend geraak as kersie- en aspersiewêreld, maar hierdie erfenis is met bloed en sweet gekoop.
So wat is my punt:
Dit is baie maklik (en ek het ook al hierdie fout gemaak) om na mense of besighede se sukses te kyk en aan te neem dat hulle maklik of oornag sukses behaal het. Maar daar is altyd ʼn prys wat iemand moes betaal het. Dalk is jy besig om die prys te betaal? Dis ook waarom die woorde “white privilege” vir my ʼn belaglike nuutskepping is.
Een van my gunstelingsêgoed is juis: “Dit het hom net tien jaar gevat om oornag sukses te behaal.”
Soos jy teen dié tyd weet (of nie), het ek my eerste digitale produkte geloods. Die e-boek is ʼn 62 bladsye lange sakehulpbron. Dit bevat 104 verkoopstrategieë en sakefoute van Afrikanersakeghoeroes asook die splinternuwe digitale tydskrif KLIPKOUERS. Klik hier vir meer inligting.
Lees ook: NAWEEK-NADINK: DIT WAAROP JY FOKUS, WORD AL HOE GROTER
