Nuwe Sitkom – Die Kasteel

Die Kasteel is ’n splinternuwe Afrikaanse kykNET-sitkom wat – soos dit ’n behoorlike sitkom betaam – regstreeks voor ’n ateljeegehoor verfilm word. Die storie gaan oor Eckhard en Tina-Marie de Wet, voorheen welaf inwoners van Waterkloof, wat al hulle geld in ’n Ponzi-skema verloor. Al wat hulle oor het, is hul luukse huis, en hulle besluit om dié in ’n boetiekhotel te omskep om die familie van totale ondergang te red. Hul donskopdogter, Michellay, probeer hand bysit en die tuinier Wilson en huishulp Cecilia moet natuurlik ook bontstaan wanneer die gaste begin aanklop – al het niemand eintlik die vaagste benul wat hulle doen nie. Die Kasteel spog met ’n sterbelaaide rolverdeling: Hannes Muller, Dorette Potgieter, Cintaine Schutte, Solomon Cupido en Pulane Sekepe is die sentrale spelers, en elke week is daar ook ’n kleurvolle span gasspelers wat die lagspiere help tokkel. Daar is weekliks ’n nuwe episode van Die Kasteel op ShowMax beskikbaar.