Wêreldwyd se Wêreldgids is so eg Suid-Afrikaans soos kerrie en rys by ’n kerkbasaar. Van biltong en braai tot dokters en motorwerktuigkundiges – hier skep ons ’n netwerk van Suid-Afrikaanse ondernemings in die buiteland. Elke week kies Wêreldwyd een van die ondernemings in die gids om in die Kollig te verskyn. Hierdie week se onderneming in die Kollig is The Whelan in Atlanta in die VSA.
Vir Suid-Afrikaners is ’n samesmelting van kulture glad nie nuut nie. Ons weet ons resepteboeke sou onvolledig wees sonder bobotie, bredie, vetkoeke en melktert – disse wat ons nie sou geken het as dit nie was vir die smeltpot van kulture wat in Suid-Afrika bymekaargekom het nie. Dit is dus glad nie vreemd om ’n soortgelyke patroon te sien waar Suid-Afrikaners in die buiteland diep spore trap nie.
The Whelan is ’n restaurant in Atlanta waar Amerikaanse gunstelinge ’n Suid-Afrikaanse kinkel kry. Tafelberg pryk op die logo, en Suid-Afrikaners en Amerikaners voel almal welkom hier. Die samesmelting van dié twee kulture kan net kulinêre meesterstukke tot gevolg hê en elke dis word afgerond met ’n glas wyn of bier van jou keuse.
Besoek The Whelan se webtuiste hier.
Besoek The Whelan se profiel op die Wêreldgids hier.
Lys jou onderneming hier.
