Oor ons
Hierdie inisiatief is die ideale platform vir elke Afrikaner wat tans in die buiteland woon, maar graag steeds in voeling met sy geboorteland wil bly.
AfriForum Wêreldwyd is al vir byna twintig jaar dié tuiskomplek vir Suid-Afrikaners wat hulself in die buiteland gevestig het.
Die inisiatief behels ’n webtuiste wat mense help om op hoogte te bly van nuusgebeure in Suid-Afrika. Hier kan jy ook betroubare advies kry, sommer net saamkuier, jou ervarings deel en meer vertel oor die interessante plekke waar jy tans woon en werk.
Ons AfriForum Wêreldwyd-span het deeglike navorsing gedoen om te bepaal wat presies vir ons mense in die buiteland belangrik is en daarom is juis dié inligting op die webtuiste beskikbaar gestel. Dit sluit aktuele plaaslike nuus en bydraes soos foto’s en stories van Suid-Afrikaners wat op interessante plekke in alle uithoeke van die aarde woon in, asook ’n Wêreldgids wat enig in sy soort is.
AfriForum Wêreldwyd se Wêreldgids is waar Suid-Afrikaanse ondernemings van regoor die wêreld bymekaarkom om ’n gemeenskap te vorm. Op dié manier raak hulle deel van hierdie wonderlike netwerkgeleentheid.
Ondernemings vanuit alle uithoeke van die aarde kan opgespoor word op die Wêreldgids. Hier kan jy dokters, prokureurs, finansiële adviseurs, haarkappers en vele meer opspoor wat hul dienste in Afrikaans lewer. Die Wêreldgids is egter nie net vir Afrikaanse ondernemings nie, maar ook vir Engelse ondernemings en diensverskaffers wie se dienste ook in Afrikaans beskikbaar is. Selfs al gaan jy net op reis in die buiteland, is die Wêreldgids handig – inligting oor ambassades, gastehuise, restaurante en apteke is tot jou beskikking.
Op AfriForum Wêreldwyd se Wêreldgids word jy nie net deel van ’n sakenetwerk nie, maar dit is ook ’n waardevolle manier om ’n ondersteuningsbasis op te bou vir daardie dae wanneer die verlange te veel raak en almal net te ver weg is.
AfriForum Wêreldwyd het ook ’n nuusbrief genaamd Kollig waarop jy gratis kan inteken. Dié nuusbrief bevat onder meer berigte van die Afrikaanse mediahuis Maroela Media, vars nuus oor feeste en buitelandse optredes deur bekende Suid-Afrikaanse kunstenaars, asook belangrike inligting oor burgerskap, paspoorte, belasting en vele meer.
Daarbenewens is AfriForum Wêreldwyd se Facebook-blad ’n uiters gewilde interaktiewe kuierplek vir alle Suid-Afrikaners, plaaslik en in die buiteland.
AfriForum Wêreldwyd streef voortdurend daarna om Afrikaners op hoogte te hou van die beste byeenkomste in die buiteland waar jy, jou vriende en familielede gesellig kan kuier en ’n gedeelde erfenis kan vier.
In die afgelope aantal jare het ons reeds verskeie medewerkers betrek en nuwe AfriForum Wêreldwyd-vriende gemaak.
Ons sien daarna uit om dié tradisie voort te sit en wil alle Suid-Afrikaanse burgers na die beste van ons vermoë dien – ongeag waar jy jouself bevind.
Bly betrokke en op hoogte van sake in Suid-Afrika.
AfriForum Wêreldwyd – Jou tuiskomplek in die buiteland!
Facebook: https://www.facebook.com/wereldwyd.co.za/
X: @wereldwyd
Instagram: https://www.instagram.com/wereldwyd.co.za/