“Praag is die hoofstad en grootste stad van die Tsjeggiese Republiek. Dit is die 14de grootste stad in die Europese Unie. Dit is ook die historiese hoofstad van Boheme.
Praag is ‘n politieke, kulturele en ekonomiese sentrum in Sentraal-Europa wat oor die 1 100 jaar van sy bestaan saam met sy lotgevalle gegroei en gekwyn het. Sedert sy ontstaan in die Romeinse tyd het Praag gefloreer in die Gotiese, Renaissance- en Barok-tydperk. Praag was nie net die hoofstad van die Tsjeggiese staat nie, maar ook die setel van twee Heilige Romeinse keisers en dus ook die hoofstad van die Heilige Romeinse Ryk. Dit was ʼn belangrike stad vir die Habsburgse monargie en sy Oostenryk-Hongaarse Ryk en ná die Eerste Wêreldoorlog het dit die hoofstad van Tsjeggo-Slowakye geword.
Praag is die tuiste van ‘n aantal bekende kultuur-besienswaardighede wat die geweld en vernietiging van 20ste-eeuse Europa oorleef het. Die belangrikstes sluit in die Praagse Kasteel, die Charles-brug, die ou stadsplein met die Praagse astronomiese klok, die Jodebuurt, Petrin-heuwel en Vyšehrad. Sedert 1992 is die uitgebreide historiese middestad van Praag een van Unesco se Wêrelderfenisgebiede.
Die stad spog met meer as tien groot museums asook talle teaters, galerye, bioskope en ander historiese uitstallings. Die stad het ‘n uitgebreide, moderne openbarevervoerstelsel. Dit is ook die tuiste van die Charles Universiteit, die oudste universiteit in Sentraal-Europa.” (Wikipedia – vertaal)
Die reisgogga het my nog altyd gebyt. In 1997 het ek die geleentheid gehad om as 29-jarige vir vyf weke op my eie met ‘n rugsak deur Europa te toer. Een van die eerste plekke wat ek op daardie toer besoek het, was ‘n week in Praag. Van toe af lê Praag my baie na aan die hart en is dit vir my die heel mooiste stad in die wêreld. In Junie het ons vir vier dae Praag toe gegaan om vriende te besoek en dit het my oortuiging bevestig.
Praag se geskiedenis en hoe alles so onberispelik gehou word, verstom ‘n mens.
Hier is ‘n paar van my gunstelinge:
- Om die eerste biblioteke ter wêreld te besoek
- Om in die oudste sinagoge wat nog in gebruik is, te sit
- Die straatmusikante
- Die opvallendheid van die Praagse Kasteel
- Die ou stadsplein en die astronomiese klok
- Om langs die Strahov-klooster te bly en die klokke te hoor
- Die Vltava-rivier en die Charles-brug
- Stad met honderd kerktorings
- Stad van groot musikante
As jy ooit die geleentheid kry om Praag te besoek, gryp dit met albei hande aan!
Ek wil graag nog baie oor Praag skryf, so hou my blog dop.
Ronel van Zyl
Fotografie – Ronel van Zyl
(My foto’s – Anton van Zyl)
BLOG ‑ http://ronelvanzyl.blogspot.co.uk/
