Bewonderaars wat al lank uitsien na ’n lekker Ray Dylan-treffer van ouds kan solank nader skuif, want met sy splinternuwe enkelsnit – BY JOU VOETE LÊ – bewys hy weereens hoekom hy as die kroonprins en kitaarkoning van Afrikaanse sokkie beskou word.
Hierdie voetjeuklekker-popsnit, wat hy gedurende grendeltyd saam met Piet Farrell geskryf het, is geïnspireer deur een van sy vriende se ervarings oorsee en gaan oor Suid-Afrikaanse boere wat in ander lande werk en huistoe verlang.
“Ek het gevoel dat ek na veertien jaar vir my mark en ondersteuners moet wys dat ek steeds by my klank en musiekstyl hou,” verduidelik die twee-en-veertig-jarige ster. “Dit is belangrik om jou aanhangers te ken en te weet wat hulle verwagting is. Ek is seker daarvan dat ek hulle nie gaan teleurstel met my nuutste vrystelling nie. BY JOU VOETE LÊ is een van daardie liedjies wat die dansvloer gaan laat gons.”
Dié opwindende nuwe lied word gekomplementeer deur ’n ewe indrukwekkende musiekvideo, wat in Parys verfilm en deur Wian van der Walt van Vonk vervaardig is. Dit vertel die verhaal van ’n paartjie wat al lank by mekaar is en die man het terugflitse van goeie herinneringe wat hulle saam gehad het.
“Ons wissel tussen optredeskote en terugflitse van die paartjie wat saam iets lekker doen, soos piekniekhou of bootry,” verklap Wian. “Ek het dit die meeste geniet om die boot- en motorfietstonele te skiet, omdat dit ’n vars en dinamiese element tot die video voeg.”
Buiten vir Ray, wat in verskeie optredetonele verskyn, is Samantha Maritz en Antonio Abreu ook te sien as die paartjie in die terugflitse.
Kyk die video hier: https://youtu.be/6tVZp-7deog
BY JOU VOETE LÊ volg in die suksesvolle voetspore van Ray Dylan se vorige treffer, Torrabaai, wat in 2020 vrygestel en baie goed ontvang is. Volgens hom, was hy so verras oor hoe mense op hierdie enkelsnit gereageer het dat hy dadelik aan die volgende een wou begin werk.
Ray Dylan is al versot op musiek vandat hy ’n tjokkertjie is en het op die ouderdom van drie begin kitaar speel. Hy was maar twaalf jaar oud toe hy saam met Bles Bridges begin toer en optree het en het oor die afgelope drie-en-dertig-jaar nog nooit getwyfel oor wat hy met sy lewe wil doen nie.
Hierdie SAMA-bekroonde musikant het oor die jare verskeie goue- en dubbelplatinumstatus-albums en -liedjies uitgereik en is veral bekend vir treffers soos Hokaai Stoppie Lorrie, Dis Verby, Jessica, Hier binne klop ’n Boerehart, Angel-face, You’re My Everything, Vir Ewig Jonk, Uitbasuin, Hier Teen Jou Lyf en meer.
Hy woon tans in Vredefort en beskou die geleentheid om deel te kon wees van groot konserte soos Skouspel en Krone en om oorsee te kon optree as van die grootste hoogtepunte van sy loopbaan sover.
Hy werk tans aan ‘n splinternuwe album waarmee hy binnekort wil gaan toer en sien uit daarna om in die nabye toekoms saam met Juanita du Plessis te werk.
BY JOU VOETE LÊ is maar net die begin van ’n hele paar groot en opwindende dinge wat dié superster vir die toekoms beplan en gaan beslis koning kraai op dansvloere en treffersparades regoor die land.
Laai die liedjie hier af: https://raydylan.lnk.to/ZQM8rDKr
SOSIALEMEDIASKAKELS:
Facebook – https://www.facebook.com/raydylan
Instagram – @raydylanmusic
Webblad – www.ray-dylan.co.za
