Willem Hendrik Maritz stap elke oggend na die Bo-Karoo Opleidingsentrum (BKO) waar hy tans besig is met sy ambag in Bou- en Siviele Konstruksie. Een ding weet hy verseker: hy wíl sy kwalifikasie verwerf.
Maritz is as baba met hidrosefalus en Dandy Walker-sindroom gediagnoseer waarvoor hy ʼn ventrikuloperitoneale (VP-) omleiding moes kry. Dit het tot gevolg gehad dat hy nierprobleme ontwikkel het en vandag slegs een nier het met 80% nierfunksie.
Verder het Maritz op die ouderdom van twee ʼn ernstige breinbesering opgedoen toe ʼn staalhek op hom geval het. Hierdie breinbesering het tot gevolg gehad dat Maritz epilepsie ontwikkel het en van voor af moes leer loop, praat en selfs eet. Dit het Maritz ongeveer vier jaar geneem om hierdie alledaagse funksies weer aan te leer, maar te danke aan die deurlopende ondersteuning van sy ma, lei hy vandag ʼn bykans normale lewe.
Hy het ook as baba sy pa verloor en alhoewel sy ma ʼn studiepolis vir hom uitgeneem het, was dit nie genoeg om die volle driejaarkursus se studiekoste te dek nie. Willem Hendrik Maritz het egter nie toegelaat dat finansiële uitdagings in die pad van sy studiedrome staan nie. In 2020 het sy pad met die Helpende Hand Studietrust (HHST) gekruis en te danke aan die getroue donateurs van die HHST kon Maritz ʼn rentevrye studielening kry en sy studies aan BKO voortsit.
Die Helpende Hand Studietrust (HHST) is ʼn geregistreerde organisasie sonder winsoogmerk wat ten doel het om studiehulp aan verdienstelike en behoeftige Afrikaanse studente te verleen in die vorm van rentevrye studielenings.
Het jy geweet jy kan ʼn behoeftige student – soos Willem Hendrik Maritz – se studiekoste vir 2022 help borg? Klik hier om uit te vind hoe jy betrokke kan raak.
