deur May-Li Swanepoel
Ruván Tarbitt, ʼn 20-jarige LLB-student van Pretoria, droom nog altyd daarvan om een van Suid-Afrika se vooraanstaande advokate te wees. ʼn Tragiese ongeluk en die verlies van sy stiefpa het egter in sy graad 11-jaar soos ʼn donker wolk oor hom gehang.
Tarbitt en sy gesin het ʼn paar jaar gelede ʼn lugballonrit ter viering van sy ma se 50ste verjaarsdag by familie as geskenk gekry. Hierdie opwindende ervaring het egter tragies geëindig – talle passasiers is in ʼn ongeluk beseer, en ʼn ander passasier het aan haar beserings beswyk. Tarbitt se ma en vyfjarige sussie het ernstige besering opgedoen en moes vir verdere behandeling na ʼn hospitaal gehaas word.
In die tyd wat Tarbitt se ma en sussie gehospitaliseer was, het Tarbitt in ʼn onverwante voorval ook sy stiefpa verloor. Daarna het hy verantwoordelikheid vir die huishouding oorgeneem en na sy ma, sussie en broer omgesien.
Nadat sy sussie ontslaan is, moes sy weens die nagevolge van die ongeluk ʼn kateter dra en moes hy haar versorg. Die mediese onkoste vir beide Tarbitt se ma en kleinsussie het meer as R1 miljoen beloop.
As gevolg van die uitermatige mediese onkoste, begrafnisuitgawes en die ander maandelikse huishoudelike uitgawes, was dit nie moontlik vir die Tarbitt-gesin om tersiêre studiekoste te betaal nie.
Vir ses maande lank, te midde sy graad 11-eindeksamen, het Tarbitt die verlies van sy stiefpa, die verantwoordelikheid van die huishouding, die versorging van sy ma en kleinsussie en die omsien na sy broer op sy skouers gedra.
Tarbitt het egter nooit teruggestaan vir die uitdagings wat die lewe oor sy pad gebring het nie. Hy het, ten spyte van sy omstandighede, volhard en uiteindelik in 2019 sy matriekjaar met lof geslaag. Tarbitt het daarna in 2020 met die Helpende Hand Studietrust (HHST) paaie gekruis, en te danke aan ʼn rentevrye studielening wat deur die HHST aan hom toegeken is, is Tarbitt vandag ʼn tweedejaar-LLB-student aan Akademia.
Helpende Hand Studietrust
Die Helpende Hand Studietrust is ʼn geregistreerde niewinsgewende organisasie wat ten doel het om hulpbehoewende studente se studies deur middel van rentevrye studielenings moontlik te maak. Vir meer inligting of om ʼn skenking aan die HHST te maak, besoek https://helpendehand.co.za/studiefondssentrum/.
