Hier in die Noordelike Halfrond word die dae al hoe korter en die weer al hoe grouer en meer winderig. Hoe kon ons so oor die hitte gekla het? dink ek terwyl ek twee sweetpakbaadjies oormekaar aantrek om die reën uit te hou. Ons langnaweek in die provinsie Valencia voel so lank gelede, maar wanneer ek deur die foto’s kyk, voel ek sommer weer die warm, polsende ritme van Spanje. Daar is sowat 2,5 miljoen inwoners in dié provinsie, en een uit drie woon in Valencia. Die vele kleiner dorpe word deur 265 verskillende munisipaliteite bestuur. Die kusvlakte tussen die berge en die see is van die vrugbaarste grond in Europa, vandaar die bekende Valencia-lemoene en ander vrugte.
Ons het toevallig in Benicassim beland en was baie beïndruk met die 6 km-lange wandelplein langs die sandstrand wat deur ’n ry van 27 tradisionele villas uit die1920’s begrens word. Die meeste geboue spog met inligtingsborde wat die geskiedenis illustreer. Blykbaar het swem – oftewel baai – vroeg in die 20ste eeu gewild geword toe die geneeskundiges besluit het dat dit ’n gesonde tydverdryf is. Al die moets, moenies en wanneers is destyds breedvoerig in die Bathing Decalogue uitgelê. Om die een of ander rede het die Spaanse elite van die kunste- en teaterwêreld destyds hul villas hier opgerig. Dié groep villas staan bekend as die Celestial Courts – of dan ’n soort hemel op aarde. Daar was destyds skynbaar soveel partytjies gehou dat die een raserige huis die hel-op-aarde-etiket gekry het. Die beroemde Amerikaanse skrywer Ernst Hemingway het blykbaar sy verhouding met oorlogskorrespondent Martha Gellhorn hier begin. Gedurende die Spaanse burgeroorlog was sommige villas tydelik as hospitale ingerig.
Deesdae is Benicassim bekend vir die groot musiekfees, die Festival Internacional de Benicàssim of FIB. Liam Gallagher en die Pet Shop Boys tree tydens die 2019-fees op – en daar is net sowat 75 naweekkaartjies teen ’n allemintige €180 oor.
So tussen al die geskiedenis en welvaart deur is dit die doodgewone menslikheid van dié deel van Spanje wat jou bybly, soos die groep dogtertjies wat ewe entoesiasties “juwele” op die strand verkoop, of die groep old-timers wat ná nege in die aand nog ewe getrou hul buitelug-jogaklas bywoon.
