Leesvordering:

Die lewe in Engeland: Deel 1

Apr 7, 2021

Deur Maxie Heppell

Ons mense in Suid-Afrika wat so tentatief en diskreet as moontlik probeer voelers uitsteek, raak my hart op ’n baie persoonlike vlak.

Die Keelvolle Koekemoers spring in met ’n uitgebreide relaas oor alles wat goor is in SA en ’n baie eksplisiete verduideliking dat hulle klaar is daarmee.

Die Versigtige Viljoens ondersoek die saak in alle erns. Hulle het baie gedetailleerde vrae oor ooreenkomste en verskille tussen lande, die finansiële impak, die aanpassingskok.

Die Skaam Swanepoels wil vra, maar wil nie hê enigiemand moet weet hulle vra nie. Want hierdie is ’n sensitiewe saak, en ons verstaan maar te goed.

Met hierdie reeks wil ons graag ’n bietjie lig werp op die lewe in Engeland – die moeilike en die lekker daarvan. Ons situasie is natuurlik uniek, so as daar enige addisionele onderwerpe is waaroor julle meer wil weet, vra gerus.

Vervoer en ander pad-dinge

Vervoer is relatief – afhangende van watter vorm jy gebruik: busvervoer is goedkoper as die moltrein (tube); die tube is goedkoper as ’n taxi.

As jy groot afstande tussen dorpe en stede reis, is die bus ook goedkoper as die treine (overland), maar reken net jou reistyd in! Dit kan nogal ’n groot verskil maak.

Spitstyd op die spore is natuurlik altyd duurder. As jy kan, is dit beter om nie tussen 06:30 en 09:30 of tussen 15:30 en 18:30 te reis nie. Ek weet! Hier begin die dae eers heelwat later. Ons SAFFAS (South Africans Far from Africa) is seker altyd eerste op kantoor.

Week-, maand- en jaarkaartjies vir die tube, trein en bus is goedkoper as om elke dag te koop.

Laai gerus die Trainline-toep af. Ons bly buite Londen en gebruik dit gereeld om tye en pryse na te gaan, en jy kan sommer aanlyn bespreek en koop ook as jy wil.

Wanneer ons in Londen is, gebruik ons graag die CityMapper-toep. Waar is die dae van ons
A-Z?

Dit is natuurlik steeds beskikbaar, as jy eerder so ingestel is. Loer gerus hier wanneer jy op OR Tambo op jou vlug wag.

Vir die waarde van die rand teenoor die pond, gebruik ons graag ons FNB toep, maar ek vind
XE Currency ook handig – net sodat ek presies kan weet wat die skade in elke geldeenheid ter wêreld sou wees.

Om in Engeland te bestuur, is egter ’n perd van ’n ander kleur. Ja, ons ry hier ook aan die linkerkant van die pad, maar dit is ongelukkig nie waar dit stop nie. Sommer op my eerste dag kry ek ’n vieslike boete van £60 (R1 200) omdat ek 5 m ver in ’n busbaan gery het … Eina! Dan is daar padreëls en dinge wat ook heeltemal nuut is vir hierdie Vrystater; padtekens ook. Maar dit is ’n interessante stukkie gesels vir volgende keer, so kom loer gerus weer hier in!

Amper-somergroete

Maxie

Lees ook: Die lewe in Engeland: Deel 2

Meer oor die outeur

Maxie Heppell

Maxie Heppell woon saam met haar man Èmil in Newbury in die Verenigde Koninkryk. Besoek gerus Maxie se blog Genade is ’n dag lank https://genadeisndaglank.wixsite.com/genadeisndaglank/blog

Soek

Volg ons op

Moet lees artikels

Laat jou taal leef – selfs al is jy in die buiteland

Laat jou taal leef – selfs al is jy in die buiteland

As jy in die buiteland woon en werk is dit maklik om van jou moedertaal verwyderd te raak. Selfs al slaag hulle daarin om steeds genoeg Afrikaans te kan praat, het baie Suid-Afrikaners in die buiteland steeds ’n behoefte om hulle taal lewendig te hou. Hoe kan jy...

Natuurhoekie – Olifantkalfie by die Shingwedzirivier

Natuurhoekie – Olifantkalfie by die Shingwedzirivier

’n Olifantkalfie geniet ’n modderbad in die Shingwedzirivier in die Krugerwildtuin, en wys vir sy ma dat hy dié tegniek soortvan bemeester het. Olifante kommunikeer op vele wyses, insluitend met geluide van ’n baie lae frekwensie – selfs soms te laag vir die menslike...

Maroela Media: Nuushooftrekke van die week.

Maroela Media: Nuushooftrekke van die week.

Maroela Media is ʼn Afrikaanse internetkuierplek waar jy alles kan lees oor dit wat in jou wêreld saak maak – of jy nou in Suid-Afrika bly, of iewers anders woon en deel van die Afrikaanse Maroela-gemeenskap wil wees. Afrikaanssprekendes ‘huiwerig’ om inenting te kry...

Nuusbrief

Kontak ons

Maak 'n donasie

Wêreldwyd vriende

Jy sal ook dalk hiervan hou…

Teken in op die Kollig-nuusbrief en bly betrokke

Jy het suksesvol ingeteken!

Pin It on Pinterest