Kersfees in Kanada is verseker anders as in Suid-Afrika. Dit is koud en gewoonlik wit gesneeu.
Die mense hier gaan heeltemal oorboord met ligte! In die tuine, teen die huise, in die bome en dan nog op opblaasfigure en figure wat uit hout gesny of met draad gevleg is.
Ons is gelukkig dat daar altyd Suid-Afrikaners was saam met wie ons Kersfees kon vier orals waar ons al gebly het (Saskatchewan en Brits-Columbië).
Ons het ons eerste Kersfees in Prince George (2013) saam met Kanadese gevier, waar ons vir die eerste keer ’n groot, vol kalkoenete beleef het. ’n Tipiese Kersete bestaan uit die kalkoen, kapokaartappels en sous, soetmielies, vulsels en ’n groen slaai. Een van die gewildste nageregte is angel food cake met vrugte en geklopte room (klaar voorberei in ’n bakkie wat soos margarienhouer lyk).
As ons tussen Suid-Afrikaners is, doen ons die boerekosding: skaapboud, rys, sous, gebakte aartappels, groenbone en soetpampoen! En moenie die gebakte poeding en vla vergeet nie! Tuisgemaakte vla, want hier koop jy nie vla in boksies nie!
Die Kanadese is egter nie almal op die ware betekenis van Kersfees ingestel nie … so, baie ignoreer die Kersfeeskerk- of sangdienste.
Vanjaar gaan ons wel Kersfees in Suid-Afrika vier – die eerste Kersfees in tien jaar by ons familie!
Groete
Karen Jordaan
