7de weergawe, Week van Nederlands: 2 tot 9 Oktober 2021 1ste weergawe wat vanjaar in Suid-Afrika gevier word.
Iets oor die volstruis
Om iets op stelte te plaas, is ’n Nederlandse uitdrukking wat losweg vertaal sou kon word as om dit in beroering te bring. Die volstruis met die lang pote en lang nek kan ver kyk, oor grense heen. Dit kan dans en daardie steltbene gebruik om ver te hardloop.
Boonop, sê Maarten Vidal, beleidsekretaris van die Taalunie, daar ís ’n uitdrukking in Afrikaans: “Sy is nes ’n volstruis, waar sy kom, daar is sy tuis.” So is die Nederlandse taal ook. Sy is steeds tuis in die monde van talle sprekers oor grense heen.
Sit jou masker op, breek die Covid-blues en kom kuier saam terwyl Nederland, België en Friesland van 2 tot 9 Oktober 2021 wêreldwyd die Nederlandse taal vier tydens die sewende weergawe van die Week van die Nederlandse taal.
Hierdie jaar word die viering vir die eerste keer in Suid-Afrika gehou, so Nederlands kyk oor alle grense heen, met ’n volstruis as logo en ’n taal op stelte. Via die webwerf van die Week van Nederlands en Voertaal sal die geleentheid wêreldwye dekking geniet.
Die naelstring steek grense oor na Kaaps, Fries en Afrikaans
Vanuit Suid-Afrika, saam met die viering van Nederlands as taal, sal Kaaps, Fries en Afrikaans ook aan die woord kom, met gesprekke oor die rol van Fries in ’n Nederlandse omgewing en waar Kaaps by dit alles inpas, of dalk juis nie? Dit kan interessant raak!
Die Afrikaanse Taalraad, Frysk Tresoar (Fries Letterkundige Museum en Dokumentatiesentrum in Leeuwarden, Nederland) met die hulp van SASNEV in Pinelands en Suid-Afrikahuis in Amsterdam sal sorg dat almal vasgenael sit en luister na dié taaldebatte.
Filmvertonings, gesprekke en heerlike kos
Vir Suid-Afrikaners is daar twee inryvertonings, verskeie gesprekke, aanlyn en in persoon, ’n kortfilmkompetisie vir voor- en nagraadse studente van Nederlands en, uiteraard, heerlike versnaperinge. Die volledige program van die Week van het Nederlands sal beskikbaar gestel word teen die einde van September.
Die organiseerders
Die Week van Nederlands word bestuur deur die Vlaams-Nederlandse Huis deBuren en word gefinansier deur die Nederlandse Taalunie. Met die hulp van die Nederlandse, Belgiese en Vlaamse diplomatieke korps en met die steun van die SAVN, is die basis in Suid-Afrika die Suid-Afrikaanse Sentrum vir Nederland en Vlaandere in Pinelands, met Studio SASNEV as die spilpunt vir gesprekke, met Voertaal as webtuiste en die Vrystaat Kunstefees as platformvennoot.
