Uit en tuis is ’n rubriek waar ons met mense gesels wat tans in die buiteland woon, of wat daar gewoon en gewerk het. Hierdie week gesels ons met Kirsten Mocke wat tans saam met haar man in Ierland woon. Kirsten vertel ons meer van hul emigrasieproses en hulle lewe in Ierland.
Hallo Kirsten, van waar in Suid-Afrika is jy en waarom het jy besluit om in Ierland te gaan woon?
Ek is van Kempton Park, Johannesburg en ek het Ierland toe getrek omdat my destydse kêrel, nou my man, (ook oorspronklik van Suid-Afrika) Ierland toe is en soveel daarvan gehou het dat hy besluit het om te bly. Ek het Ierland twee keer besoek voor ek die groot trek aangepak het in Desember 2019.
Jy het in Desember 2019 geëmigreer, vertel ons bietjie hoe het jy die emigrasieproses ervaar?
Die vaarwel by OR Tambo-lughawe was ’n baie moeilike dag vol trane, maar ons het almal gedink ons sal mekaar gou weer sien. Niemand sou kon raai dat dit twee jaar sou wees voor ons mekaar weer sou sien nie. Covid-19 het alles soveel moeiliker gemaak.
My eerste aand in Ierland as my nuwe tuiste sal ek nooit vergeet nie. Dit was Desember, so middel van die winter, die huis was koud, want niemand was tuis voor ons om die verhitting aan te sit nie. Dit was pikdonker en die stortwater was soos ys. Ek het net begin huil en ’n totale “meltdown” gehad.
Ek was die eerste ses maande sonder werk in Ierland en dit was ʼn verskriklike moeilike tyd. Daar was dae wat ek enigiets sou gee om net my tas te kan pak en terug huis toe te vlieg. As ek terugdink besef ek as dit nie vir Covid-19 was nie, sou ek heel moontlik moed opgegee het en terug huis toe gegaan het, maar dit was net nie ’n opsie nie. Ek moes uithou en aanhou.
Ek is nou amper drie jaar in Ierland en alhoewel alles nie perfek is nie, voel ek meer tuis.
Wishing tree in Kenmare
Kenmare Stone Circle
Was Ierland se klimaat ’n groot aanpassing?
Die winters is koud en lank en die son gaan sak baie vroeg. Ek dink dit is ’n groot aanpassing maar met tyd raak alles beter. ’n Goeie gehalte dik baadjie, ’n dik serp, handskoene en ’n mussie maak dinge meer draagbaar.
Kry jy kans om te reis?
Covid-19 het dit moeilik gemaak om te reis en toe ons uiteindelik kon reis wou ek net huis toe om my familie te sien. Ons kon al ’n bietjie van Ierland verken en ek hoop om in die toekoms meer van Europa te sien.
“Glamping” in Killarney Cork
Gougane Barra
Is daar enige Suid-Afrikaanse winkels naby jou waar jy trooskos kan kry?
Daar is twee winkels binne 40 minute van ons huis wat Suid-Afrikaanse produkte verkoop soos Nik Naks, Ghost Pops en Creme Soda. Daar is ook ’n slaghuis wat boerewors en biltong verkoop.
Wat mis jy die meeste van Suid-Afrika? Wat is die een ding wat jy wens jy in jou tas kon pak toe jy geëmigreer het?
Die is seker almal se antwoord maar ek wens ek kon my familie in my tas pak. Dis die moeilikste ding om oor te begin in terme van ’n ondersteuningsnetwerk. Ierse mense is vriendelik, maar dit is net nie MY mense nie en ek dink baie Suid-Afrikaners voel so wanneer hulle emigreer.
Ek wens ook ek kon Woolworths in my tas pak, want Woolies is net die beste. Ek mis Afrikaans praat, ek mis ons land se kultuur. Ek mis Koo-konfyt, kaalvoet rondloop en chili bites.
LEES OOK: Uit en tuis: ’n e-pos uit Edinburgh
Wil jy jou eie Uit en tuis-rubriek hê?
Woon jy in die buiteland of het jy dalk onlangs teruggekeer uit die buiteland? Jy kan ook ’n Uit en tuis-rubriek vir ons skryf. Stuur ’n e-pos na wereldwyd@afriforum.co.za en ons stuur vir jou vrae om te beantwoord.
