Dapper Media het op 11 Oktober 2020 ’n nuwe dokumentêr oor die Boerekrygsgevangenes van Sint Helena bekendgestel.
Hierdie dokumentêr is ’n 20 minute avontuur saam met die bekende Afrikaanse sanger en liedjieskrywer Adam Tas, AfriForum se uitvoerende hoof, Kallie Kriel en Meyer le Roux, mede-eienaar van die Buffelsfontein-groep. Dit handel oor die geskiedenis van die mooi eiland, Sint Helena, en die rol wat dit in die Anglo-Boereoorlog gespeel het.
Gedurende die Tweede Vryheidsoorlog, wat van 1899 tot 1902 geduur het, het die Engelse sowat 27 000 krygsgevangenes geneem. Baie van hierdie gevangenes is in kampe in Suid-Afrika aangehou, maar daar was egter ook kampe in plekke soos Bermuda, Silon, die hedendaagse Sri-Lanka, en dan ook Sint Helena.
Die Transvaal en Vrystaat het geen bestaande weermag gehad soos Brittanje nie en dit het veroorsaak dat burgerlikes opgeroep was om die grondgebied te verdedig. Hierdie burgerlikes was enige man wat kon veg. Daar was selfs soldate so jonk as 8 jaar en so oud as 80 jaar wat gevange geneem en weggevoer is na hierdie kampe.
Sint Helena was dié perfekte tronk-eiland aangesien dit baie afgeleë was en ontsnapping bykans onmoontlik gemaak het.
Hierdie dokumentêr bied ’n bietjie insig oor die omstandighede en die krygsgevangenes wat hul lewe gegee het vir hul land.
Dit is definitief ’n stukkie geskiedenis wat jy nie wil mis nie en wat jou oë sal oopmaak en jou hart sal trots maak op ons land en ons mense!
Kyk die dokumentêr gratis op www.dappermedia.co.za en volg ons op Facebook vir nog nuus, dokumentêre en gehalte-inhoud!
Besoek Dapper Media se Facebook-blad.
