Deur Ilze Nieuwoudt
Die ondertekening van die Vrede van Versailles op 28 Junie 1919 was na afloop van die Eerste Wêreldoorlog een van verskeie verdrae wat amptelik ’n einde aan dié verwoestende oorlog gebring het. Die Groot Oorlog, soos dit destyds bekendgestaan het, het vier jaar lank vanaf 1914 tot 1918 geduur en was in elke opsig “groot”. Nagenoeg 265 800 Suid-Afrikaners het aan die oorlog deelgeneem, met talle Suid-Afrikaners wat ook as deel van ondersteunende dienste (waaronder die Swaarartilleriebrigade, Skerpskutters, Geneeskundige Diens, Vlieënierskorps, Arbeidsbataljons en Vlootvrywilligers) diens gedoen het.
Sowat 10 miljoen soldate is uiteindelik in dié oorlog dood; sowat 9 miljoen mense is permanent vermink; 12 miljoen is ernstig gewond; en meer as 8 miljoen is krygsgevange geneem. Die oorlog het ook die hulp van meer as 16 miljoen diere (perde, posduiwe, honde en kamele) ingespan, terwyl meer as 1 000 miljoen bomme in die vier jaar van die oorlog afgevuur is.
Louis Scott se boek oor dié oorlog, Hel toe en terug: Die Eerste Wêreldoorlog, ’n honderd jaar later, stel op ’n toeganklike manier, en binne die bestek van minder as 170 bladsye, ondersoek in na dié oorlog – en dít boonop in Afrikaans. Hel toe en terug is hier beskikbaar in AfriForum Uitgewers (voorheen bekend as Kraal Uitgewers) se veilige aanlyn winkel.