Saai, ’n organisasie wat die belange van familieboere beskerm, en wat dus wildboere insluit, het onlangs kommentaar ingedien op die VK-regering se konsultasie of die in- en uitvoer van jagtrofeë na en van die VK verbied moet word. Die oproep tot bewyse en konsultasie om menings en getuienis deur kenners in te win, is aangekondig deur Zac Goldsmith, minister vir internasionale omgewingsake. Die geleentheid vir kommentaar loop op 25 Januarie 2020 ten einde.
Oorbenutting en die onvanpaste bestuur van jagaktiwiteite word as die grootste redes tot kommer voorgehou, want volgens die VK se departement vir omgewingsake, voedsel en landelike sake (Defra) is hierdie die belangrikste aspekte wat tot die uitwissing van spesies en verlies aan biodiversiteit lei.
“Die wettige en volhoubare aanwending van die natuur, asook wettige handel in jagtrofeë het grootliks tot die herstel van kwynende spesiepopulasies bygedra. Dit het selfs diere soos die bontebok, die bastergemsbok en die swartwitpens van uitwissing gered,” sê Francois Rossouw, uitvoerende hoof van Saai.
Die wildboerderybedryf dra nie net tot die beskerming van die natuur by nie, maar lewer ook ’n beduidende bydrae tot die ekonomie in die vorm van toerisme en die skep van werkgeleenthede.
“Ons is daarvan bewus dat Suid-Afrika in dié debat as ’n treffende voorbeeld voorgehou word om teenkanting vir trofeejag te werf. Die feite en navorsing wat teen ons wildboerderybedryf gebruik word, is swak en ons glo dat wildboere en hul verteenwoordigers die geleentheid gegun moet word om hul kant van die argument te lug voordat ’n besluit geneem word,” voeg Rossouw by.
Met inagneming van Defra se verklaring – dat beleidskeuses ten opsigte van trofeejag in die toekoms bespreek moet word – het Saai ’n vergadering met Defra versoek om ’n voorlegging te lewer oor die wildboerderybedryf in Suid-Afrika in samewerking met netwerkvennote van regoor die bedryf.
