Deur Fanie van der Merwe
Wat is die eerste ding wat in jou kop spring wanneer jy aan China dink?
Megastede? Wolkekrabbers? Fabrieke? Besoedeling? Mensmiershope?
Bogenoemde tel beslis onder die newe-effekte wat met die vinnigste nywerheidsomwenteling in die geskiedenis van die mensdom gepaard gaan, en daarom is China waarskynlik vir baie mense sinoniem met dié ongewenste byprodukte van ontwikkeling en vooruitgang.
Dit is ook so dat bykans alle verbruikersgoedere vandag in China vervaardig (en nagemaak!) word, wat meebring dat lug-, water- en klankbesoedeling van die grootste kopsere is waarmee die stadsvaders in dié geooste te kampe het. Maar in ’n klassieke voorbeeld van ’n yin-yang-ewewig, huisves hierdie reuseland ook talle van die wêreld se mees skouspelagtige natuurlike wonders, waarvan die Zhangjiajie Nasionale Park in die Hunanprovinsie een van die juwele in dié kroon is.
Die owerhede het ons onlangs bederf met ’n langnaweek, wat aan ons die ideale geleentheid gebied het om besoek aan daardie deel van hierdie fassinerende land af te lê. Tussen Zhangjiajie en die nabygeleë Tianzi Mountain het ons die volgende aangetref:
- Loopplanke met glasbodems wat enige hoogtevreeslyer van sy fobie sal genees. Permanent. Omdat hy aan ’n hartaanval sal beswyk.
- Dosyne sweefspore, waarvan een die langste ter wêreld is. Myne is tog langer as joune.
- Die rotsoerwoud waar die fliek Avatar verfilm is.
- ’n Hysbak wat jou binne sekondes 330 m teen die wand van ’n krans ophys.
- Natuurskoon wat jou mond laat oophang.
- Miljuisende Chinese natuurliefhebbers.
Dit bly ’n eiesoortige uitdaging om in die Chinese hartland te reis, aangesien verreweg die meeste mense wat jy daar teëkom se Engels beperk is tot “hello”, “okay” en “David Beckham”. Maar aan die positiewe kant is my stomstreke-vaardighede nou weer vlymskerp. Een woord, twee lettergrepe, eerste lettergreep klink soos…
Tydens ons besoek het ons niks gebreek, verlê, verpas of verloor nie. En niks belaglik, bedroewend of byderwets het gebeur nie. Derhalwe is hierdie inskrywing eerder ’n fotoverhaal as ’n woordverhaal, en as dié tipe ding jou behaag, kom loer gerus in by Instagram, waar ’n verskeidenheid minifotoverhaaltjies van my reise oor die jare op jou wag: instagram.com/man_takes_on_world
Besoek gerus Fanie se webblad, Fanie Os Oppie Jas, en sy Facebook-blad, Fanie Os Oppie Jas: howzit my China.
Lees ook: Fanie wie?
Foto’s: Fanie van der Merwe
