AfriForum sal op 21 November ’n internasionale dag van protes teen plaasmoorde hou en op Saterdag, 25 November ’n protesoptog na die Uniegebou om ’n memorandum aan die president te oorhandig.
Die internasionale dag van protes sal in aanloop tot die protesoptog plaasvind en sal uit twee aksies bestaan. AfriForum se plaaslike strukture en veiligheidsnetwerke sal op 21 November by meer as 100 polisiestasies regoor Suid-Afrika memorandums oorhandig waarin die prioritisering van plaasmoorde geëis word. AfriForum se afdeling vir internasionale skakeling organiseer ook Suid-Afrikaners regoor die wêreld om op daardie dag memorandums by hul ambassades te oorhandig. ’n Feiteblad, waarin belangrike inligting oor plaasmoorde opgesom word, sal op hierdie dag ook aan internasionale en buitelandse media versprei word.
Suid-Afrikaners in die buiteland wat op 21 November aan die internasionale dag van protes wil deelneem en ’n memorandum by hul ambassade wil oorhandig kan AfriForum kontak deur ’n e-pos na wereldwyd@afriforum.co.za te stuur.
