Op 19 Oktober 2011 het Izak du Preez – tandheelkundestudent aan die Universiteit van Pretoria – se lewe heeltemal verander. Dit is op hierdie dag wat sy pa ʼn beroerte gehad het, wat hom later sy werk gekos het. Izak se pa was vir twee jaar as medies onbevoeg verklaar om te werk, en dit het groot finansiële implikasies vir die gesin ingehou. Hoewel dit nie altyd maklik was nie, het Izak se ma daarin geslaag om haar drie kinders en haar man finansieel te ondersteun, terwyl haar man tuis aangesterk het.
Izak se pa het tot so ʼn mate herstel dat hy in 2013 weer kon terugkeer werk toe; alhoewel hy op daardie stadium vir ʼn laer salaris aangestel was, het die gesin se finansiële druk verminder.
Die Covid-19-pandemie het egter nóg finansiële uitdagings vir die Du Preez-gesin ingehou. Gedurende 2020 het Izak se ma haar werk as bestuurder by ʼn trouvenue verloor, en sy pa se salaris het met 15% verminder. Die gesin het ʼn verbandlening op hul huis probeer uitneem sodat hulle Izak se tersiêre studies kan betaal, maar dit was ongelukkig afgekeur.
Izak se droom om tandheelkunde aan die Universiteit van Pretoria te studeer het egter nie verlore gegaan nie, en sy pad het in September 2020 met die Helpende Hand Studietrust (HHST) gekruis waar ʼn rentevrye studielening aan hom toegeken is.
Die Helpende Hand Studietrust (HHST) is ʼn geregistreerde niewinsgewende organisasie wat daarop gemik is om studiehulp aan behoeftige Afrikaanssprekende studente – in die vorm van rentevrye studielenings – te verleen.
Om ʼn verskil in ʼn student, soos Izak, se lewe te maak, klik hier.
LEES OOK: Vurige Sol-Tech student vertel van haar liefde vir dieselwerktuigkunde
