Op 21 Maart het die vure behoorlik gebrand by die Brisbane Afrikaanse Kerk se skaapbraai! Ons het vier skape gebraai wat saam 92 kg geweeg het. 75 kg se houtskool is gebruik en 142 mense het saam geëet en gekuier.
Die vure het vroeg al begin brand en Louis Nel en sy span het hulle hande vol gehad met die vier skape, maar dit was alles die moeite werd en almal het heerlik gesmul!
Die mans het gesorg dat daar genoeg vleis was terwyl die vroue gesorg het vir smullekker slaaie. Elna Olivier het seker gemaak daar was ietsie vir die soettand ná die ete.
Mense het van oral af kom saamkuier en dit was beslis ’n braai vir die boeke! Die Brisbane Afrikaanse Kerk bied elke jaar ’n skaapbraai, basaar en potjiekoskompetisie aan wat honderde Suid-Afrikaners lok. Dit is geleenthede soos hierdie wat ons maar net weer laat besef jy kan ons in enige land in die wêreld laat beland, maar as daar ’n klomp Suid-Afrikaners bymekaar is, word daar behoorlik gekuier!
Ons volgende funksie is die potjiekoskompetisie op 21 Mei 2022. As jy die beste potjie maak, maar nog net die trofee nodig het om dit te bewys, of net lekker wil saamkuier om die potjies, is hierdie net die geleentheid vir jou. Daar is hope pryse op die spel en ook gelukkige trekkings vir dié wat net saam kuier.
Die Brisbane Afrikaanse kerk het dienste elke Sondag om 08:30 vanuit die Seventh Day Adventist Churchin Londonstraat in Eight Mile Plains. Kom kuier gerus een Sondag saam en kom luister na ds. Gawie se boodskap. Daar word altyd ná die diens heerlik gekuier.
Groete uit Brisbane!
Die Brisbane Afrikaanse Kerk