Die meeste mense is op soek na hul roeping, daardie iets wat ’n mens laat tik. Ek, Nina Loubser beskou myself egter as gelukkig omdat ek reeds van jongs af geweet het wat ek met my lewe wil doen – ek wou sing!
Ek het geweet dat om hierdie droom te verwesenlik geld gaan kos, aangesien sanglesse nie pasella is nie en kitare nie sommer uitgedeel word nie. In graad nege het ek toe die besluit geneem om my eie onderneming te begin, Pebble Vibes. Met die hulp van my ma kon ek dadelik aan die werk spring en my onderneming het vinnig gegroei. Ek het dié naam gekies omdat ek aanvanklik armbandjies uit semi-kosbare edelstene gemaak het met ’n gelukbringertjie (“charm”) aangeheg wat soos ’n woefie se voetspoor lyk. Van die begin af wou ek ’n gedeelte van my wins vir Wollies-diereskuiling skenk en so ’n verskil maak – daarom die woefievoetspoor-gelukbringertjie. Dieselfde jaar het my ma van AfriForum se Besigheidsbytjies-entrepreneurskompetisie gehoor, ek het dadelik belanggestel en ingeskryf. Ek het die geleentheid gehad om my produkte by die Voortrekkermonument uit te stal gedurende ’n mark.
Ek is toe as die algehele wenner van die Juniorpreneurs-kompetisie (graad 8–9) aangewys. Met die kontantprys kon ek uiteindelik ’n kitaar koop asook sagteware wat my eintlike passie vir musiek en sang ’n hupstoot kon gee. In graad tien het ek my steeds met Pebble Vibes besig gehou en my passie vir musiek aanhou volg, en vandag is die reeks uitgebrei om items in te sluit soos gevlegte armbandjies met verskillende gelukbringertjies, onder meer hartjies, ’n stukkie legkaart en een wat lyk soos ’n gevoude lint vir die bewusmaking van outisme.
Soos my selfvertroue gegroei het, het ek aan sangkompetisies begin deelneem. In graad 11 het ek ’n aanbod gekry om my onderneming te verkoop. Ek het die aanbod aanvaar en is tans besig met ’n nuwe idee vir ’n ander onderneming.
Gedurende dié tyd hoor ek toe van die DMH-modelagentskap wat op soek is na nuwe talent. Die agentskap skep ’n platform vir modelle, akteurs, sangers en dansers van reg oor Suid-Afrika om hul talent internasionaal bekend te stel en ’n loopbaan te bou. Die finaliste wat gekeur word kry die geleentheid om vir opleiding te gaan wat oor vyf dae strek in Los Angeles, Hollywood. Gedurende die vyf dae word werkswinkels deur bekende kunstenaars aangebied. Dit is een van die opwindendste ervarings vir enige aspirant-sanger en beslis ’n “stepping stone” en tree vorentoe.
Ek het al my moed bymekaargeskraap en vir ’n oudisie gegaan, en daar dring ek toe sowaar deur, en aan die einde van hierdie jaar vlieg ek Los Angeles toe!
So nou werk ek harder as ooit aan my ondernemings om genoegsame fondse in te samel en my ouers het ook met skarefinansiering begin om my doel te bereik. Ek is so dankbaar vir AfriForum se Besigheidsbytjies-entrepreneurskompetisie – dit het my baie van entrepreneurskap geleer en dit vir my moontlik gemaak om my ware passie van sang ten volle na te streef.
Ek wil hierdie geleentheid gebruik om meer jong mense aan te moedig om aan AfriForum se Besigheidsbytjies-entrepreneurskompetisie deel te neem. Dit het gehelp om my drome te bewaarheid.
Volg my storie en klik hier om my te hoor sing, of as jy my wil help om in Hollywood uit te kom, klik hier om ’n bydrae te maak.
Aandag alle jong entrepreneurs
Vanjaar se Besigheidsbytjies-kompetisie inskrywings is nou oop en jy moet nie hierdie geleentheid mis nie. Skryf nou in vir Besigheidsbytjies 2023: https://besigheidsbytjies.co.za/skryf-in/
Volg AfriForum Sakenetwerk se sosiale media, Facebook en Instagram
