Die burgerregteorganisasie AfriForum doen ’n dringende beroep op boere en landelike inwoners om hul veiligheid en paraatheid op te skerp. Volgens dié organisasie was daar die afgelope week minstens sewe plaasmoorde landswyd. Die afgelope naweek alleen is daar vier mense vermoor in twee aparte voorvalle. In beide insidente is bejaardes geteiken.
Hennie en Anneke Claassen is wreed gemartel en vermoor op ’n plaas buite Ohrigstad, terwyl Pierre en Belinda de Kock op hul plaas buite Piketberg vermoor is.
Die organisasie betuig sy innige meegevoel met die familie en vriende van die slagoffers.
“AfriForum maan boere en landelike inwoners om dringend by hul plaaslike buurt- of plaaswagte betrokke te raak. Die enigste manier om hierdie gruwelike aanvalle hok te slaan, is vir gemeenskappe om te mobiliseer en hul paraatheid te verskerp,” sê Jacques Broodryk, AfriForum se woordvoerder vir Gemeenskapsveiligheid.
“Die wreedaardige manier waarop hierdie misdade uitgevoer word, is ’n duidelike aanduiding dat dit nie net gewone misdaad is nie. AfriForum sal aanhou om druk op die regering te plaas en te eis dat plaasaanvalle as ’n prioriteitsmisdaad verklaar word en die nodige aandag van die owerhede geniet,” sluit Broodryk af.
Beveilig ’n plaas
AfriForum het ’n veldtog geloods om boere van die nodige basiese opleiding te voorsien om plaasaanvalle te verhoed en oor hoe om te reageer tydens en ná ’n aanval.
Boere word ook opgelei in basiese noodhulpprosedures, wat spesifiek fokus op die soort beserings wat meestal tydens sulke aanvalle opgedoen word.
Alhoewel baie landelike inwoners vuurwapens besit, is nie alle plaasbewoners noodwendig opgelei in die hantering van vuurwapens nie. Daarom bied AfriForum ook basiese opleiding in vuurwapenhantering aan.
Dra by om ’n plaas te beveilig. Besoek www.beveilignplaas.co.za vir meer inligting.
As jy ons aksie wil steun vanuit die buiteland, gaan na:
Vriende van AfriForum
