Deur Alana Bailey
Onlangs het nuusberigte opnuut die aandag gevestig op die groeiende smokkelbedryf van inheemse plante.
’n Verstommende 20 000 plantspesies word in Suid-Afrika aangetref. Dit verteenwoordig sowat 10% van alle plante op aarde. Sindikate wat plante stroop en daarmee smokkel, neem nou letterlik rooi datalyste van plantsoorte wat in die land aangetref word, gaan soek daarna en stroop dit om dit in die buiteland aan versamelaars te verkoop.
Wanneer die misdadigers met plante in hulle besig vasgetrek word, word die plantjies deur die owerhede aan die Suid-Afrikaanse Nasionale Biodiversiteitsinstituut (Sanbi) oorhandig om dit te probeer red. Personeel van Sanbi vertel dat hulle oorweldig word deur veral duisende teruggeneemde vetplante wat hulle so kry en in hulle kweekhuise moet probeer huisves. Helaas kan alle plantjies nie gered word nie. Sommige kom uit streke met unieke klimaatsomstandighede wat moeilik elders nageboots kan word, of is so hardhandig uit die grond verwyder, dat dit onherstelbaar beskadig is. Sanbi probeer hulle bes om te red wat dit kan.
Die vervolging van plantsmokkelaars neem ook toe, met 96 wat gearresteer en 36 sake wat in 2022 in plaaslike howe aangehoor is. Volgens ’n berig van Netwerk24 is drie burgers van die Verenigde Arabiese Emirate aan die einde van 2022 elk ’n boete van R1 miljoen opgelê in verband met plantsmokkelary. Strawwe is dus baie streng, maar skrik nie die oortreders af nie.
Kopers van skaars plante moet uiters versigtig wees om nie hierdie misdadige bedryf te ondersteun nie. Dit is beter om altyd moeite te doen om vas te stel waar die plantjies vandaan kom, voordat jy jou ook onwetend aan ’n misdaad skuldig maak.
Van ons plantrykdom gepraat, die Afrikaanse name van ons floraskatte betower ’n mens altyd. Dink maar aan vetmensie, perdetande, oumansbaard, hasiekos, beestong, knoppiesbeestong, wolftoon, bergklokkies, bababoudjies, vingerpol, meelplakkies, sonwyserblom, asemsnak-malva, skoonma se kussing, skoonma se tong, naaldebossie, bobbejaanstert, skilpadvoetjie, botterboom, dobbelsteentjie, skaaptongetjie, gansmis en halfmens.
Hopelik sal die smokkelary nie tot gevolg hê dat ons nageslag eendag net in boeke van hierdie kosbare plantjies lees nie.
