“Boeke is soos brood en moet soos brood behandel word.” Dié woorde van die Afrikaanse akademikus en oudredakteur van die Tydskrif vir Letterkunde, Elize Botha, bevat ’n “broodnodige” waarheid. Ja, die mens kan sekerlik nie van brood alleen leef nie, maar dit is eenvoudig ’n basiese noodsaaklikheid!
Kraal Uitgewers is 20 jaar gelede deur Paul Alberts gestig met die doel om hoëgehalteboeke oor die Anglo-Boereoorlog (met ’n sterk fokus op die foto-erfenis daarvan) te publiseer. Ná dié internasionaal gerekende fotograaf oorlede is, is die uitgewer by die Solidariteit Beweging ingelyf en publiseer reeds sedert 2010 tientalle werke deur vooraanstaande historici en meningsvormers. Afrikanergeskiedenis vorm steeds die kern van die uitgewer se werk, maar die fokus is intussen ook uitgebrei om aktuele publikasies sowel as enkele letterkundige werke en letterkundige ontledings in te sluit.
Militêre kenners, tophistorici, internasionaal gerekende letterkundiges en meningsvormers se boeke is reeds in die afgelope aantal jare deur Kraal Uitgewers gepubliseer. Die voormalige hoof van die Suid-Afrikaanse Weermag, generaal Jannie Geldenhuys, se boek Ons was daar, dr. Jackie Grobler se bekroonde publikasie Die Eerste Vryheidsoorlog, 1880-1881 en Kill the Boer deur AfriForum se Ernst Roets is enkele van die boeke wat reeds daartoe bygedra het dat die feite oor die Afrikaner se verre verlede, meer onlangse geskiedenis én hede reggestel word.
Kraal Uitgewers se e-winkel maak boonop dit vir lesers in alle uithoeke van die land (én wêreld) moontlik om ’n Kraal-publikasie te koop. Klik hier om die winkel te besoek – maak vandag nog seker dat daar nie “broodgebrek” op jou boekrak is nie!
Lees ook Kraal-skrywer en -redakteur vereer met toptoekennings
