AfriForum het vandag ’n brief aan die Minister van Internasionale Betrekkinge en Samewerking, Naledi Pandor, en die Departement van Internasionale Betrekkinge en Samewerking (DIRCO) gestuur rakende die onlangse nuus dat ’n Suid-Afrikaanse diplomaat (adv. David Kweli Nkosi) die woonstel in Wene, Oostenryk, waar hy gewoon het, in so ’n beskadigde toestand gelos het dat die geraamde koste om dit te herstel en op te knap rondom R715 000 beloop.
Volgens die eienaar van die woonstel, Karl Widy, soos in die media berig, was al die elektriese toestelle in die kombuis vernietig en al die waardevolle messeware weg toe hy in Augustus 2020 uitgetrek het. Daar was geen glase oor nie, die yskas en mikrogolf was vernietig, die venster- en deurrame was beskadig, die wasbak, bad en toilet was gevlek, die mure en vloere was vuil en gevlek met swart roet, en die plek het gewemel van kakkerlakke.
“Sulke gedrag deur ’n Suid-Afrikaanse diplomaat is onaanvaarbaar en belastingbetalers behoort nie belas te word om vir hierdie skade te betaal nie. AfriForum se standpunt is dat die diplomaat adv. David Kweli Nkosi uit sy sak vir die skade moet betaal,” sê Ernst van Zyl, veldtogbeampte vir strategie en inhoud by AfriForum.
AfriForum hoop om binnekort van DIRCO en/of die minister te hoor.
