In Desember 1880, drie jaar ná die Britse anneksasie van die Zuid-Afrikaansche Republiek (ZAR) in 1877, kom bykans 10 000 Transvaalse burgers op die plaas Paardekraal byeen. Die gewigtige besluit word geneem om die regering van dié Boererepubliek eensydig te herstel. Die Britse owerhede in Pretoria en Londen volhard steeds in hul minagting van die Boere se vryheidstrewe. Wat hierop volg, is drie maande van militêre stryd tussen die grootste koloniale mag van destyds en enkele duisende Boerekrygers. Die verloop en uitkoms is veral vir die Britte onverwags en die deurslaggewende Boereoorwinnings in Natal en die finale slag by Majuba op 27 Februarie 1881 swaai die stryd in die guns van die Transvaalse Boere.
Dié stryd, later bekend as die Eerste Vryheidsoorlog, word in detail uiteengesit in die boek Die Eerste Vryheidsoorlog, 1880-1881 deur dr. Jackie Grobler. Dit is die mees omvangryke bron oor dié oorlog nog en bevat nagenoeg 200 foto’s, kaarte en illustrasies. Die werk maak ’n uiters waardevolle bydrae tot die Suid-Afrikaanse geskiedskrywing en is in 2019 met die Protea Boekhuisprys vereer. Die Eerste Vryheidsoorlog, 1880-1881 is steeds beskikbaar by Kraal Uitgewers. Klik hier vir meer inligting.
