Buitelandse minderjariges wie se ouers dieselfde van het en wat saam met albei ouers reis, sal binnekort nie meer ’n geboortesertifikaat hoef te toon wanneer hulle Suid-Afrika binnekom nie. Hierdie vereiste het groot struikelblokke vir internasionale toerisme veroorsaak, en veranderinge sal dit vir buitelanders makliker maak om met hul kinders te reis. Minderjariges uit lande wat ’n visum benodig, sal steeds ’n geboortesertifikaat moet indien wanneer hulle aansoek doen vir ’n visum, maar hulle sal nie daarmee hoef te reis nie.
Die departement van binnelandse sake het die hersiening op 22 Maart 2019 gepubliseer. Hulle hoop wanneer hierdie verslapping van die reëls ten volle geïmplementeer is, sal dit help om toerismegetalle te verhoog omdat dit vir gesinne makliker behoort te wees om sonder probleme deur Suid-Afrikaanse doeane te kom.
Volgens Sue-Ann de Wet, AfriForum se projekkoördineerder vir Suid-Afrikaanse diaspora, is hierdie veranderinge waarskynlik te laat. “Dit het die regering vier maande geneem om duidelikheid oor hierdie situasie te kry. Ons het ons kommer oor die gevolge van die visumregulasies uitgespreek toe dit aanvanklik in 2014 aangekondig is. Suid-Afrika se toerismebedryf het reeds groot verliese gely, waaronder verliese aan werksgeleenthede.”
Soos in baie ander lande is daar spesiale vereistes vir kinders wat alleen reis, kinders wat saam met net een ouer reis, en ouers met verskillende vanne.
Die reisregulasies vir Suid-Afrikaners jonger as 18 bly dieselfde. Hulle moet ’n volledige geboortesertifikaat en skriftelike toestemming deur hul ouer(s) of voog(de) toon vir goedkeuring van hul reisplanne. AfriForum doen ’n dringende beroep op ouers om nie oorgerus te wees nie. Dit is beter om vroegtydig aansoek te doen vir ’n volledige geboortesertifikaat om teleurstelling te voorkom wanneer u wil reis.
